علاج الاكتئاب: الأدوية، الجلسات الاستشارية والعلاج الطبيعي

في طرق كتير بنستخدمها في علاج الاكتئاب منها الدوائي ومنها النفسي، وقبل ما نتكلم عن علاج الاكتئاب، محتاجين نعرف ايه هو الاكتئاب!

الاكتئاب هو مرض خليط من أعراض نفسية وجسدية، لكن ممكن نقول ان اكتر حاجة بتميزه هي الحزن الشديد اللي بيمنعك من انك تواصل حياتك بشكل كويس، والإكتئاب زيه زي أي مرض ممكن يصيب الإنسان لا هو قلة إيمان ولا هو عيب، ومن المعروف أن نسبة الإصابة بالمرض ده ممكن توصل لـ 12% بين الرجال و 25% بين النساء.

انك تصاب بالاكتئاب ده مش نهاية العالم، لأن الاكتئاب زيه زي أي مرض ممكن نعالجه عن طريق:

• الجلسات الاستشارية
• الأدوية
• علاجات تانية

وده بيخليك ترجع لحياتك بشكل طبيعي، ولكن ممكن نقول ان أهم عنصر في علاج الاكتئاب هو رغبتك في انك تتعالج، لأن من غيرها نتايج علاج الاكتئاب هتكون محدودة.

أعراض الاكتئاب

من أهم الأعراض دي:

• اضطرابات في النوم
• العصبية والكآبة
• تغيير في الوزن (زيادة أو نقصان)
• تغيير في الشهية
• انك تحس التعب
• التفكير في الانتحار أو محاولة الانتحار
• آلام في الجسم من غير سبب

أسباب الاكتئاب

مش معروف، لغاية دلوقتي، السبب الدقيق اللي بيجيب اكتئاب.

ولكن في اعتقاد بيقول: ان عوامل كتير بيوكيميائية ووراثية وبيئية بتكون مسببة لمرض الاكتئاب، هنتكلم عنهم بالتفصيل:

• عوامل بيوكيميائية: الأبحاث بتأكد ان أدمغة الاشخاص المصابين بالاكتئاب بتكون مختلفة عن أدمغة الاشخاص الطبيعيين.
• عوامل وراثية: الأبحاث برضه بتقول ان فرص الشخص اللي عنده قرايب عندهم اكتئاب انه يصاب بالاكتئاب أكتر من الشخص اللي معندوش قرايب عندهم اكتئاب.
• عوامل بيئية: ساعات بتبقى البيئة هي السبب في الاكتئاب، والمقصود هنا بالعوامل البيئية أوضاع وظروف الحياة، زي فقدان شخص عزيز، أو مشاكل اقتصادية.

ايه الهدف من علاج الاكتئاب؟

في الجزئية دي احنا هنتكلم عن أهداف علاج الاكتئاب وهم:

1. التخلص من أعراض زي الحزن، وآلام الجسم، واضطرابات النوم والشهية.
2. تحديد ايه الاسباب اللي سببت الإصابة بالمرض ده سواء كانت عائلية، أو اجتماعة، أو بيئية.
3. ان الشخص يعرف الاسباب دي كويس ويفهم ايه اللي محتاج يعمله عشان ميجلوش اكتئاب تاني.

نقط مُهمة قبل شرح علاج الاكتئاب

• عشان بعض المشاكل الاجتماعية اللي ممكن تحصل قبيكون صعب إن المريض يقبل إنه اتشخص بالاكتئاب أمر صعب، لكن لازم نعرف ان التشخيص في المراحل الأولى للمرض بيخفف كتير من مضاعفاته، وبيقصر من مدة علاج الاكتئاب، وبيمنع الإصابة بيه مرة تانيه.
• دعم الأهل والصحاب مهم جدًا.
• آلام الجسم وأوجاعه هتروح مع علاج الاكتئاب.
• مش دايمًا هتحتاج علاج! في بعض الحالات البسيطة والمتوسطة مش هتحتاج للعلاج الفوري، لكن ممكن الدكتور اللي بيعالجك يطلب منك انك تكتب يومياتك والأعراض اللي بتحس بيها وبعد كده يحطلك خطة العلاج.
• الحالات الشديدة بس هي اللي هتحتاج تدخل علاجي فوري بالجلسات الاستشارية والأدوية.
• الاكتئاب ساعات بيجي بسبب أمراض تانيه زي السكتة الدماغية، والخرف، والسرطان، وكسل الغدة الدرقية، والجلطات القلبية، والسكر، أو بسبب بعض الأدوية زي الكورتيزون.

أنواع العلاجات المختلفة للاكتئاب

أولًا: الجلسات الاستشارية ودورها في علاج الكآبة

الجلسات الاستشارية والتحليل النفسي ممكن يخففوا الأعراض بنسبة 50% ولكن مشكلتهم إن مفعولهم بطيء بياخد حوالي من 8 لـ 10 أسابيع عشان تبتدي نتايجه تظهر.

ممكن نقول ان العلاج النفسي أو الجلسات الاستشارية عبارة عن تفاعل بيحصل بين شخصين أو اكتر، بين الطبيب النفسي والمريض، أو وسط مجموعة علاج، وبيتكلم فيها المريض عن الحاجات اللي محتاجها عشان تساعده يتعالج، وعن طريق المناقشة اللي بتحصل بيمكن علاج التجارب الصعبة اللي مر بيها المريض وإيجاد حلول ليها كمان، والمريض ممكن يكون فرد أو زوجين أو عيلة أو مجموعة.

مقالة ليها علاقة: أسعار جلسات الدكتور النفسي في مصر عن تجربة

من المهم برضه نعرف ان العلاج النفسي مش مجرد دردشة ولكنه بيعتمد على التفاعل بين الأفراد، وعلى ان يبقى في أهداف واضحة للعلاج، مثلًا علاج الاضطرابات العقلية أو مشاكل الحياة أو تخفيفها، والدراسات بتقول ان العلاج النفسي هو أكتر علاج فعال لعلاج الاكتئاب.

في كتير من الأحيان بيكون انك تتكلم مع شخص بتثق فيه مفيد جدًا، لكن العلاج النفسي بيعتمد على انك تتلقى المساعدة عن طريق دكتور نفسي مدرب.

ثانيًا: الأدوية المستخدمة في علاج الاكتئاب

أنواع أدوية الاكتئاب

1. موانع امتصاص السيروتونين الانتقائية – The selective serotonin reuptake inhibitors

زي: فلوكستين (بروزاك®)، سرترالين (زولفت®)، باروكستين (باكسل®)، سيتالوبرام (سيلكسا®)، ايسيتالوبرام (ليكسابرو®)

المجموعة دي من الأدوية بتزود الموصل العصبي الكيميائي السيروتينين في الدماغ، لأن بعض الدراسات أثبتت أن أدمغة مرضى الاكتئاب عندها نقص في الموصل ده، وبالنسبة لأعراضه الجانبية فأعراضه الجانبية قليلة بالنسبة للأنواع التانيه وهي الهياج، والصداع، والغثيان، والإسهال، ولو طالت مدة الاستخدام بيحصل فقد للرغبة الجنسية، وعشان نتفادى العرض ده ممكن نضيف أدوية تانيه زي ببريبون (ويلبترن ®)/ بسبيرون (بوسبار®).

2. ببريبون (ويلبترن ®)-Bupropion (Wellbutrin®)

الدوا ده مختلف شوية عن الأدوية اللي قبله في انه بيعمل على تغير مستويات الموصلات العصبية الكيميائية في الدماغ لكن بدون تأثير مباشر على السيروتينين، وهو يعتبر منشط معتدل لمرضى الاكتئاب اللي بيعانوا من التشتت وعدم التركيز، وأعراضه الجانبية قليلة ولكنه ممكن يسبب تشنجات عصبية عند مرضى فقدان الشهية، وممكن يسبب أرق، ويقلل من الشهية، ويسبب فقدان للوزن، ويمكن اللي يختلف فيه الدوا ده عن أي مضادات إكتئاب تانيه أنه مبيأثرش على الرغبة الجنسية.

3. موانع اعادة امتصاص السيروتينين والنورايبينيفرن – serotonin norepinephrine reuptake inhibitors

زي: فينلافاكسين (إيفوكسر®)، دولوكستين (سمبلتا®)

المجموعة دي مخصصة للناس اللي مبتستجبش لمضادات الاكتئاب التانية، وهي بتعمل على تغير مستويات الموصلات العصبية الكميائية في الدماغ، ومن أعراضه الجانبية الغثيان، والدوخة، والخمول، وقلة النوم، والإمساك.

4. مضادات الاكتئاب الترايسايكلك – Tricyclic antidepressants

زي: امبرامين (توفرانيل®)، امتربتليين (إلافيل®)، دسبرامين (نوربرامين®)، نورتربتلين (باميلور®)، كلوميبرامين (انفرانيل®)

المجموعة دي بتعمل على تغير مستويات الموصلات العصبية الكيميائية في الدماغ، ومن أعراضها الجانبية جفاف الفم، وتشوش الؤية، والإمساك، والغثيان، وصعوبة التبول، والخمول، وزيادة الوزن، ومشاكل جنسية، وزيادة ضربات القلب، والأعراض دي بتزيد مع المسنين، عشان كده الأدوية دي بقى قليل أوي ان يتم استخدامها خاصة ان في أنواع تانيه بتسبب أعراض جانبية أقل.

5. موانع انزيم مونوأمين أوكسيديز – Monoamine oxidase (MAO) inhibitors

زي: ترانيل سبرومين (بارنيت®)، فيناليزين (ناردل®)

المجموعة دي بتمنع الإنزيم اللي بيكسر الموصلات العصبية الكميائية وبالتالي بيزيد مستواها بالدماغ، ومن أعراضها الجانبية الدوخة، وصعوبة التبول، وجفاف الفم، والصداع، وآلام بالمعدة، وتشنجات العضلات، والإرهاق، لكن المشكلة في المجموعة دي هي التداخلات مع أي أكل متخمر (يحتوي على تيرامين) زي الأجبان والموز، والتداخل ده بيسبب ارتفاع حاد في ضغط الدم!

6. أنواع تانيه مبتستخدمش كتير

ترازدون (ديسرل®)، trazodone (Desyrel®)

مرتازبين (ريميرون®)، Mirtazapine (Remeron®)

ثالثًا: علاجات تانية مؤثرة في الاكتئاب

ومنها الصدمات الكهربائية، والتحفيز المغناطيسي المتكرر للدماغ، والرياضة، والعلاج بالضوء وهنتناولهم بالتفصيل:

• الصدمات الكهربائية: العلاج بالصدمة الكهربائية هو نوع من أنواع العلاجات غير الدوائية اللي بنستخدمها في علاج بعض الأمراض النفسية وخاصة الاكتئاب. فكرة العلاج بتعتمد على التحفيز الصناعي لحالة الصرع عن طريق تمرير تيار كهربائي إلى خلايا الدماغ. الطريقة دي اكتشفوها ان بيحصل تحسن عند الناس اللي عندها صرع واكتئاب في نفس الوقت بعد ما يحصلهم نوبة صرع، فبدأوا ساعتها يفكروا في التحفيز الصناعي لحالة الصرع لعلاج الاكتئاب في الثلاثينات.
• التحفيز المغناطيسي المتكرر للدماغ: هو عبارة عن إجراء طبي الهدف منه تحسين أعراض الاكتئاب وبيستخدم فيه المجال المغناطيسي لتحفيز الخلايا العصبية. وبيتم استخدام الاسلوب ده لو فشلت الاساليب التانية في العلاج. فعلى الرغم من ان الاكتئاب مرض زي أي مرض قابل للعلاج، إلا ان العلاج الدوائي والنفسي ساعات مبيأديش للتحسن المطلوب، فلازم يكون في علاجات تانيه.
• الرياضة: لما بتمارس الرياضة في الغالب بتتحسن أعرض الاكتئاب والقلق، وده لأن الجسم بيفرز مادة الإندورفين وهي مادة كيميائية مرتبطة بتحسن المزاج وتقليل معدل الاكتئاب. والدراسات بتقول ان الرياضة المنتظمة بتساعد في علاج الحالات الخفيفة والمتوسطة من الاكتئاب.
• العلاج بالضوء: هو فرصة كويسة للناس اللي بترفض استخدام الأدوية لعلاج الاكتئاب، وهو علاج فعال للإكتئاب، فبيتم تعريض المريض للضوء بألوان مختلفة لمدة نص ساعة لساعتين الصبح لكذا يوم.

في النهاية ممكن نقول ان في حالة حسيت بأي عرض جانبي خلال أخدك لمضاد الاكتئاب أو أي علاج لازم تبلغ الدكتور بده، لكن متوقفش علاج، الدكتور هيقولك على طرق تتفادى بيها العرض الجانبي ده سواء كانت أدوية تانيه تعالج العرض الجانبي، أو يقللك الجرعة، أو يغيرلك وقت الدوا، لكن مهم جدًا متوقفش علاج بدون استشارة الطبيب، لأن لو وقفت الدوا من دماغك ده هيعرضك لانتكاسة قد يصعب علاجها.