إيه العلاقة بين نوبات الهلع والكحول؟
عادة ما بتيجي نوبات الهلع والكحول باكدج واحدة مع بعض، لأن كل واحد فيهم بياخدك للتاني، لو كنت قلقان بخصوص نوبات الهلع اللي بتحصلك وبتحاول تتحكم فيها عن طريق شرب الكحوليات، فلازم الأول تفهم تأثير الكحوليات عليك، خليك عارف إن في طرق صحية كتير عشان تقدر تتحكم في نوبات الهلع، واللي مش هتعرضك لمخاطر تضر صحتك وعافيتك على المدى الطويل، وبرضو افتكر إن نوبات الهلع مش نقطة ضعف؛ وانما زيها زي اي مرض محتاج علاج متخصص.
لو كنت بتشرب كحوليات بشكل مبالغ فيه(لدرجة الإدمان)، ودا اللي سببلك نوبات هلع، فيستحسن إنك تلحق تطلب المساعدة عشان تبطل ادمان الكحول في اسرع وقت ممكن، ويمكن الدعم من اخصائيين هي الخطوة الإيجابية اللي هترجعلك السيطرة على حياتك.
ليه الكحول مش علاج لنوبات الهلع؟
اعراض نوبة الهلع ممكن تبقى مخيفة جدا من عرق ودوخة وضيق تنفس أو حتي هلاوس بصرية وشعور بأنك خلاص هتموت!
الكحول ممكن جدا يقلل أو حتى ينهي الأفكار المقلقة اللي بتكون سبب رئيسي في حصول نوبات الهلع، بس الأكيد انه مجرد حل مؤقت، بمجرد ما الكحول يخرج من جسمك هترجع تاني الأفكار دي، لو كنت بتشرب بشكل مستمر عشان توقف نوبات الهلع فا للأسف على المدى الطويل هيكون ضرره أكبر، علاجك لنوبات الهلع بالطريقة دي هيخليك معتمد نفسيا على الكحوليات، اعتمادك عليه عشان يبعد عن افكارك ومشاعرك المقلقة هيبقى عرض من اعراض الإدمان، يا اما هتكون بتشرب كميات كبيرة عشان تتخلص من مخاوفك أو بتشرب عشان ميحصلكش اعراض انسحاب،
لو فعلا بتشرب الكحول عشان تتحكم في نوبات الهلع فا انت عملت زي اللي جه يكحلها عماها لأن شرب الكحوليات نفسه ممكن جدا يؤدي لنوبات الهلع، ودلوقتي جه الوقت تفكر في طرق تانية تتعامل بيها مع مشاعرك، ودي نصيحتنا ليك لأن الكحول طريقة خطيرة،، ناس كتير بتحس بقلق بعد الشرب، ولو نوباتك المنتظمة سببها الكحوليات يبقى الموضوع خطير!
وقتها لازم تقف وتراجع نفسك في شربك للكحول، على الرغم من إنك عارف ان سبب انتظامها هو الكحول فمن الأحسن إنك تطلب مساعدة مهنية عشان تتعامل مع مشكلة شربك.
إزاي أوقف شرب الكحول واتحكم في نوبات الهلع؟
اهم خطوة وأول خطوة هو إنك تلاقي مكان مختص لعلاج ادمان الكحوليات ومجموعة دعم نفسي عشان تقدر تتحكم في نوبات الهلع، ودول ممكن طبيبك المختص يدلك عليهم.
ممكن تمشي على خطة علاج زي دي:
- برنامج علاج الإدمان – طبعا دا مش لكل الناس، البرنامج دا لما تكون خلاص مش قادر توقف شرب وبيجيلك اعراض انسحاب، أو لما تكون بتشرب وبيصاحب الشرب نوبات الذعر، ممكن تقيم الإقامة في مركز من مراكز التأهيل عشان الوقت والمساحة اللي هتديها لنفسك بعيد عن حياتك وروتينك اليومي دا اللي هيفهمك انت ليه بتشرب، ودا غير انه هيعلمك ازاي تدير حياتك وتتخطي مشاكلك من غير كحوليات وطبعا دا من خلال جلسات جماعية وورش وندوات ووقت فردي مخصص ليك، وقتها هتبدأ تفهم تاثير الكحول عليك وعلى دايرتك الاجتماعية وهتكتشف ازاي تعيش حياتك من غيره.
- جلسات العلاج الجماعية– برامج العلاج هتديك مساحة آمنة تدعمك في اكتشاف مشاكلك الشخصية والتعبير عن مشاعرك وقلقك وازاي تتحكم في شربك للكحول وازاي تتحكم في نوبات الهلع في المستقبل.
- الأدوية ممكن دكتورك يكتبلك الأدوية المضادة للإدمان جنب جلسات العلاج، حسب شدة نوبة الهلع عندك.
احنا فاهمين كويس ان صعب عليك تبدأ في خطوة من دول، بس نصيحتنا ليك قبل كل دا انك تعترف إن عندك مشاكل لازم تحلها وتتعالج منها عشان تعرف ترجع لحياتك الطبيعية.
