اثر الصلاة على الصحة النفسية

بيجي علينا أوقات في السنة والواحد بيبقى روحانيا حابب يتقرب من ربنا ويزود عبادته وصلاته، والراحة النفسية اللي بيلاقيها في قربه من ربنا وفي الصلاة بتكون كبيرة وعظيم اثرها على النفس، دكاترة كتير حوالين العالم ادركوا فوائد الصلاة على الصحة العقلية مع ان قياس اثرها على الدماغ صعب لأن اغلب اللي بيصلوا وبيتعبدوا بيكونوا ساكتين لانها بتكون مناجاة بين النفس وربها، حاول الدكاترة انهم يدخلوا اليوجا (فن التأمل) مع الصلاة عشان يزودوا الأثر النفسي الإيجابي.

الصلاة والاكتئاب

كتير كنا بنسمع لما حد يقول انا عندي اكتئاب اول حاجة الناس بتنصحه بيها هي الصلاة وفعلا معاهم حق! بتوضح العديد من التقارير حول تطبيق الصلاة في العلاج النفسي النتيجة الإيجابية عند الأفراد اللي بتظهر عليهم أعراض مرضية مثل التوتر والقلق والاكتئاب والميول المعادية للمجتمع، سلطت الدراسات دي الضوء على فعالية الصلاة كعلاج للاضطراب العقلي عند اتباعها بالشكل والقياس الصحيحين.

الصلاة بتعزز الشعور بالارتباط والسكينة مع قوة اعلى من أي شيء، مع رب سامع صوتك الداخلي من غير ما تتكلم بصوت عالي، الناس بتصلي لاسباب كتير بجانب ان الصلاة فرض، الا ان السبب اللي بيخليك تقوم تصلي ممكن يكون شكر أو عزاء أو رجاء أو طلب بالحماية، عشان كده الخبراء بيقولوا ان مش كل الصلاة اثرها على النفس متساوي، كونك بتصلي وبتتعبد كروتين يومي مع الوقت الصلاة هتفقد اثرها علي نفستك هتكون بتردد الكلام وحركات جسمك كانها روتين بدون ما تستشعر اثر الصلاة العظيم.

ربط الصلاة بالحالة الذهنية

الدكاترة بينصحوا وانت داخل تصلي أو تتعبد أو تدعي إنك تجدد نيتك في كل مرة، وتفكر انا داخل اصلي وانا محتاج ايه اطلبه من ربنا، حصلي ايه كويس لازم اشكره واحمده، دكاترة الصحة النفسية بيقولوا ان الناس اللي في علاقتهم مع ربنا بتكون علاقة قريبة وإيجابية طلب واحتياج وحمد بتكون صحتهم النفسية والجسدية افضل من الأشخاص الساخطين على أقدار الله واحكامه، لأن من اهم أسباب اللجوء للصلاة هو التنوير الروحي والشعور بالسلام والطمأنينة ودا اللي بيخفف من التوتر والقلق والسلبية.

ربط الصلاة بالفرحة والراحة والخلاص من الهموم والمشاكل هيكون من أول الحاجات اللي هتحس بيها مع كل صلاة، ربطك لكل المشاعر الإيجابية دي بالصلاة هيكون سبب في انك تحب تقوم تصلي وتتعبد وتتأمل، التركيز على التلاوة وعلى الحركات الجسدية وربطها مع الشق الروحي وحالتك الذهنية دا اللي هيخلق شعور بالسكينة هو اللي بيغير من حالتك النفسية.

الصلاة واليوجا: تكامل ولا تناقض؟

بداية انتشار اليوجا كانت ممارسة لاسلوب حياة صحي، وانتشرت حركاتها واتطورت بغض النظر عن انتمائها الديني، عشان تكون من اكثر الرياضات البدنية شيوعا، واللي خلاها تنتشر بالشكل دا هو اثرها على العقل في انه يكون صحي وواعي ويمد الشخص بالسعادة ويطول عمره، وبعد تحليل دكاترة علم النفس لقوا ان الأثر النفسي لليوجا شبيه لحد كبير لأثر الصلاة على الفرد، ودا طبعا باختلاف المفاهيم والعقيدة الدينية، فا اليوجا بتقوم على حركات جسدية ومخاطبة للعقل والروح (بدون خلفية دينية أو تنوير الهي)، ولكن لما تربط التأمل واليوجا وتوسيع مدارك عقلك عن طريقه وانت بتصلي وبتتعبد دا هيضاعف الأثر النفسي الإيجابي على صحتك وعلى عقلك.