أربع حلول عشان تتخلص من التسويف

يعنى أيه التسويف الأول ؟

كلنا عندنا مهام كل يوم واجب علينا أننا نعملها صح الطالب بيذاكر الموظف بيروح الشغل التسويف بقا يا سيدى أنك تأجل مهام اليوم لبكره الطالب يقول هذاكر بكره يجر بعده وبعده وميذاكرش لحد ما تتراكم عليه المذكره ويجى الأمتحان وهو مذاكرش أى حاجه يعنى بأختصار نأجل أعمال النهارده لبكره ومن بكره لأيام كتيير جدا .

خطوره التسويف

لازم تعرف أن التسويف ممكن يهدم حياتك وهو عدوك الأول وعشان تحقق أهدافك لازم تتخلص منه فورا وخلى بالك أن التسويف هيسرق وقتك هتلاقى الطالب الى قولتلك عليه الى كل يوم بيقول من بكره هبدء أذاكر بيحصل فى الأمتحانات على درجات ضعيفه طيب لو أنت من الناس الى بتأجل تعالى أقولك أزاى تتخلص من التأجيل نهائيا .

أربع حلول عشان تتخلص من التأجيل

أصنع مهام صغيره

 لو عندك مذاكره كتير أو شغل كتير قسم الى مطلوب منك أنجازه لو عندك مذاكره ملزمه مثلا 20 صفحه قسم المذاكره لأجزاء أربع صفح مثلا عشان عقلك بيرفض أنك تضغطه لو حملت عليه أجزاء كبيره بيوصلك رساله مخادعه أنك محتاج تنام عشان يتخلص من الضغط الكبير الى عليه يعنى أنت مكنتش عايز تنام ولا حاجه عقلك بيهرب بس

مكافأه لنفسك

لما تخلص جزء من المهمه الى أنت قسمتها أدى لنفسك مكافأه لأنك عملت أنجاز حقيقى . فى أنواع بقا للمكافأت شكولاته لو بتحب الحلويات ممكن تلعب بلاستيشن أو تتفرج على أفلام المهم تختار أى حاجه محببه لنفسك وتعملها .

أكتب الانجازات الصغيره الى أنت عملتها كل يوم

أعمل قائمه بكل الحاجات الكويسه الى عملتها طول اليوم مهما كانت بسيطه حفظت خمس أيات فى القرءان  أو لعبت فى الجيم أو ذاكرت ساعه أو وصلت للشغل بدرى دى كلها أنجازات بسيطه جدا لكنها بتصنع فرق كبير جدا معاك لما تشوف بكره الصبح وتقول لنفسك أنا عملت حاجات كتير و ده و ده شىء عظيم . 😎

خليك حازم مع نفسك وصريح

لازم تكون حازم مع نفسك وتحاول تتحكم فيها وتلتزم بالخطوات الى مفروض تعملها من غير كسل أو تأجيل ولما تغلط تعاقب بنفسك بالحرمان من حاجه أنت بتحبها وخلى بالك الأهمال والكسل هيضيعوا  وقتك