حاسب من الصدمة النفسية بعد ما تسيب الشغل خاصة لو عليك التزامات

الصدمة النفسية بعد ما بتسيب الشغل بتبقى من أصعب الصدمات عشان مصدر رزقك وقف، وبتشوف الحياة سودا وخلاص قفلت من كل ناحية وتبدأ تنعزل وتكتئب وتزعل كل تفكيرك بيبقى محطوط على المشكلة وبس من غير ما نفكر في الحل..

الصدمة النفسية بعد ما تسيب الشغل :

  • كلنا مرينا أو هنمر بأصعب وقت لما يجي عليك ظرف ويخليك تسيب الشغل ومصدر رزقك أنت وأسرتك، مهما كان السبب أستقاله أو مشكلة مع حد في الشغل أو تقصير منك، لكن النتيجة واحده التعب النفسي عشان سبت الشغل، بيترتب عليه حاجات كتير بتدخل في دوامة حزن شديدة وعصبية على كل إلي حواليك بتتعصب من أقل حاجة وعلى أي حد، وكأن خلاص أخر الدنيا وكل أبواب الرزق أتقفلت في وشك، بتبدأ تتقوقع على نفسك ومتحبش تخرج ولا تقابل حد ولا تتكلم مع حد كل إلي بتحتاجه أنك تنعزل عن كل الناس وتعيش في عالمك الحزين لوحدك، بتبدأ تبطل أكل وتبطل شرب وتخس أو تأكل كتير وتتخن وحياتك تتلخبط وتبقى مش عارف رأسك من رجليك، لو سبت نفسك للحالة دي هتدخل في نوبة اكتئابات مش هتخلص

7 طرق تخرجك من الصدمة النفسية بعد ما تسيب الشغل:

1- أعرف أنت سبت الشغل ليه :

  • أنت أستقلت ولا كانت مشكلة مع المدير، لو مشكلة مع المدير كان أيه سببها؟ تقصير ولا المدير مش طايقك ولو مش طايقك مش طايقك ليه لحد ما تعرف إي سبب أنك سبت الشغل

2- حسن مهاراتك :

  • في فترة الفراغ دي متسبش نفسك للصدمة النفسية والاكتئاب، خد كل حاجة كتبت عنها في ليه سبت الشغل وحسن منها، سواء كان لغه أو تعامل أو مهارات تعامل مع البشر وأقرأ عن مجالك أكثر، عايزين رجوعك يبقى رجوع أسد

3-أكتشف نفسك :

  • فرصة أنك تكتشف مواهبك المدفونة بسبب الشغل، جرب ترسم أو تمثل أو تقرأ، مش يمكن تطلع ممثل أكبر من رائع وأحسن من شاروخ خان

4-علاقتك الأسرية :

  • لأن الشغل كان بيأخد من وقتك كتير، دلوقتي فرصة أنك تقعد مع أهلك وتتكلم معاهم وتعيش مع ولادك شوية تصاحبهم وتفسحهم، وشريكة حياتك ترجع حبك ليها تاني

5- العلاقات الاجتماعية :

  • أبدأ وسع دايرتك وشوف مين مكنتش بتكلمه بسبب مشاغل الشغل وأسأل عليه وزور صحابك وقرايبك وأعمل علاقات اجتماعية جديدة

6-الروحانيات :

  • أعرف عن دينك أكثر وأعمل أنشطة خيرية وفرح وساعد الناس وأقف جمبهم وخليك عون ليهم، هتلاقي مفاتيح الفرج بتتفتح ليك باب باب من بعد الضيق

7- دور على شغل :

  • دور على شغل جديد أو مجال جديد بسرعة، مش وقت ندم وزعل على الشغل القديم أبواب الرزق كتيرة، أوعى تيأس وأفضل دور لحد ما تلاقي شغل مناسب تعوض فيه كل حاجة وتخرج فيه إبداعك

أقرا كمان عن الصدمة النفسية : إيه أسبابها وأعراضها وإزاي نخرج منها

قولنا أحسن الطرق إلي تتجاوز بيها الفترة دي؟

اترك تعليق