6 خطوات عشان تربى ابنك يكون ذكى

الذكاء هو ميزة ليها فوايد كبيرة و الذكاء هنا مش معناه أنه يجيب درجات كويسة بس في المدرسة ، دلوقتى بقى من المعروف والواضح جدا أن الذكاء مش أبيض وأسود بمعنى أن الذكاء ليه أنواع كتيرة أوى مش مقتصرة بس على النجاح على المستوى الأكاديمى ، كمان طريقة تفاعل الأهل مع الطفل بيكون ليه تأثير كبير على تطور الطفل وذكائه ، وواحدة من أكبر الإنجازات هي أن الأهل يجهزوا ولادهم أن يكون عندهم استقلالية ويعلموهم دايما أن عقلهم يكون متفتح يقدروا شعور الإنجاز والتطور مش بس يبصوا للهدف النهائي . ودى طرق تساعد الأهل أن أولادهم يكون عندهم وعى أكتر وبالتالي يعيشوا بذكاء :

1- طريقة ردك واستجابتك للطفل :

الطريقة اللى بتستجيب بيه للطفل هي اللى بتفرق ، يعنى مثلا لو أنت بتتفاعل مع ابنك في أي حاجة بيقولهالك بأسلوب فيه لا مبالاة أو دايما بتحاول تقيده ده بيقلل من حماسه في أنه يجرب أي حاجة جديدة وبتخليه يكون حذر جدا من رد فعلك . علشان كده حاول دايما أنك تشجع ابنك من خلال أنك تسأله أسئلة مفتوحة وتخلق مساحة للتفكير تزود الوعى عنده وتصحح المفاهيم الغلط لأن الطفل هيكون زكى جدا لو كان عنده فرصة يناقش أفكاره ويشوف وجهات نظر مختلفة .

2- تحديد وتقييد القواعد بتزود نسبة الذكاء :

فكر في القواعد اللى أنت حاططها لابنك وايه هي القواعد الضرورية ، والأبحاث أثبتت أن عدد القواعد اللى الأسرة بتحطها بتأثر على نسبة الإبداع عند الأطفال ، وأن الأطفال اللى عندها 6 قواعد أسرية بتكون نسبة أدائهم متوسطة في المدرسة.

وأبحاث تانية بينت أن أكتر المهندسين المعمارين إبداع في الولايات المتحدة كان أهلهم بيشجعوهم على تطوير نفسهم على كل المستويات بما فيه المستوى الأخلاقى من غير ما يفرضوا قواعد تقييدية تحكمية ، كمان لازم نسمح لولادنا أنهم يطوروا شعورهم بالصح والغلط من مصادر مختلفة مش مقتصرة على الأهل بس ،لأن ده بينمى ذكائهم وإبداعهم أكتر .

وصاحب الدارسة دى عرف الإبداع أن هو :

الخصائص الشخصية للأفراد المبدعين هي الذكاء الواسع والانفتاح على الخبرة والحساسية الجمالية والاستقلالية في الفكر والسعى لإيجاد حلول وتحقيق التحديات وحب الاستطلاع والنقد والاكتفاء الذاتي وتحقيق الذات وسرعة البديهة والتعاطف مع الآخر والحساسية العاطفية والخيال والطموح والهيمنة والقبول الذاتي والثقة بالنفس وتقبل وجهات النظر المختلفة .

وعلى العكس ما الأهل فاكرين أن كل ما القواعد تكتر كل ما هيقدروا يربوا طفل مثالى ، لكن الحقيقة هي أن فرض قواعد كتيرة بيقلل من إحساس الطفل بالإبداع والذكاء ، لازم كمان أن الطفل يكون ليه نشاطات مفتوحة وحرة بشكلها الصح .

الأكيد أن الأطفال محتاجين قواعد مهمة تنظم حياتهم لكن المبالغة في تقييد الطفل بيكون ليه آثار سلبية على المدى البعيد .

3- اسمح لابنك أنه يحس بملل :

عادة بنبص للملل أنه شيء سلبى ،كمان الأكيد هو أننا كأهل لازم نحفزشعور الإبداع عند ولادنا وبالتالي لو الطفل حس بملل بنخليه يشغل وقته على طول بحاجات ممكن هي مش مناسبة ليه أو مش من اهتماماته ، لكن في الحقيقة أن الملل مش كله سئ لأنه بيحفز قدرة الطفل على التفكير .
التفكير الهادى بيضيف منظور مختلف و بيكون مساحة للعقل أنه يفكر و يخلق أنشطة جديدة . الملل على الرغم من أنه سئ بيكون هو الوقت المناسب للدماغ للتطوير والإبداع.

4- خلى أولادك يشوفوك بتعمل حاجات إيجابية وذكية :

الأطفال بتاخد بالها من كل حاجة حواليها ، وبالذات أفعال الأهل . والتعلم من سلوك الكبار هي واحدة من الطرق الأساسية اللى الطفل بيتعلم منها العادات وبتدى معنى للعالم حواليه . لو ابنك شايف أنك بتشارك في حاجات مفيدة زى القراية والكتابة هيقلدك وهيكون ذكى جدا فى النقطة دى .

كمان مهم أوى زى ما قلنا قبل كده أنك تتكلم قدام ابنك عن أهمية الإنجازات والمحاولات وطرق تجاوز المشاكل بدل من التركيز على النتيجة النهائية بس .

5- شجع أولادك يخوضوا المخاطر ويفشلوا :

على الرغم من أننا كأهل عندنا ميل طبيعى لحماية أولادنا من الإحساس بالضيق ، لكن السماح للأولاد بأنهم يخوضوا تجارب و يفشلوا هيعلمهم مهارات حياتية أساسية في سن صغير . معاناة الطفل من الفشل في سن صغير هيساعدوا على احترام وتقدير نفسه لأن الخوف هو الشعور الأول في حياتنا اللى ممكن يمنعنا أننا ناخد قرارات كبيرة ، لكن لما نشجع أولادنا على تجربة الفشل وهما صغيرين هيقلل الخوف عندهم .

كمان لازم نعلم الطفل أن الفشل مش شيء سئ او مش هيخيله شخص سئ أو مرفوض ، لكن هو مهارة بتسمحلهم ياخدوا قرارات ذكية ويتعلموا أن الحياة صعود وهبوط مش بتمشى على خط واحد . في النهاية ، الطفل محتاج أنه يجرب الإحساس علشان يفهمه ، لكن حمايته من الإحساس ده هيمنعه من التكيف وفهم معنى الحياة الحقيقى .

6- خلى القراية والموسيقى جزء من حياة ابنك :

القراية مش بس بتنمى ذكاء الطفل لكن كمان بتطور حس المعرفة عنده ، لأنها بتسمح للمخ بأنه يخلق منظور مختلف ويعرف وجهات نظر مختلفة ويتعرف على مواقف ويطورالخيال وده هيساعده في جميع مجالات الحياة ، وبالتالي تعطشه للمعرفة هيزيد أكتر وده هيخليه يقدريتواصل مع العالم .
الموسيقى كمان ليها آثار إيجابية على دماغ الطفل ، وداراسات كتيرة بينت أن الاستماع للموسيقى مش بس بيعزز الانتباه والدافع والتعلم والذاكرة لكن كمان بيقلل من التوتر اللى بيكون ليه آثار ضارة على طريقة عمل الدماغ .

اترك تعليق