توقعات الأبراج: نُسخة الأمراض النفسية

عادة بنشوف مقالات كتيره بتتكلم عن مميزات كل برج من الابراج الفلكية، لأننا كلنا بنحب نسمع الجوانب الحلوة في شخصياتنا. بالتأكيد يعنى كل واحد فينا عنده حاجات كويسة في شخصيته تستاهل انها تتقال، إنما مع المميزات دي أكيد في كوارث برضه بيتميز بيها كل برج. وفي الآخر مميزات وعيوب كل برج هي اللي بتشكل شخصيته المميزة.

إيه هي أكتر الأبراج المُعرضـة للإصابة للإضطرابات النفسية؟

الحقيقة إن كل برج مُعرض لإضطرابات نفسية مخنلفة عن التاني.. مثلا كلنا عارفين إن برج الحمل بيميل انه يكون شجاع جدا بس برضه ده ممكن يخليه عدواني في بعض الأحيان. بس نقدر نقول ان السمات الشخصية لكل برج ممكن تكون نتيجة حاجات كتير حصلتله في حياته ومن ضكنها المشاكل النفسية اللي بيواجهها.

برج الحمل (21 مارس-19 ابريل)
الاضطراب الانفجاري المتقطع

من المعروف ان أصحاب برج الحمل هما الأكثر عدوانية بين الابراج الفلكية، والشخص من برج الحمل لما بيعاني من اضطراب الشخصية الانفجاري المتقطع ممكن يمر بنوبات غضب عدوانية مرعبة مش متناسبة ابدا مع الموقف اللي بيمر بيه الشخص.

برج الثور (20 ابريل-20 مايو)
اضطراب الوسواس القهري

أكثر صفة صعبة في اصحاب برج الثور هي العناد، وانهم عندهم طريقتهم الخاصة اللى بينفذوا بيها اى حاجة هما عاوزينها، عشان كدة لو فكرت تناقش أي موضوع جديد مع أصحاب برج الثور أعرف ان المهمة هتكون صعبة جدا، دة غير ان السلوك الصارم اللى بيتميز بيه أصحاب برج الثور بيعرضهم للإصابة باضطراب الوسواس القهري اللي بيخليهم عاوزين كل حاجة ماشية بالظبط زى ما هما عاوزين، ولو بس مقدروش يحققوا اللي هما عاوزينة ممكن يتعرضوا للذعر زى الناس اللى عندهم OCD.

برج الجوزاء (21 مايو-20 يونيو)
اضطراب الشخصية الاعتمادي

أصحاب برج الجوزاء ميقدروش يعيشوا وحدانيين، ده حتى علامة البرج عبارة عن شخصين لازقين في بعض، ودة بيرجع لأنهم دائما محتاجين يحسوا بالحب والاطمئنان، ودة ممكن يدفعهم للدخول في علاقات اعتمادية، يتهرب فيها الجوزاء من الواجبات الأساسية المفروضة عليه ويعتمد على شريكة للاهتمام بيه، ودة من اوحش العيوب في الجوزائيين.

برج السرطان (21 يونيو-22يوليو)
اضطراب الشخصية البارانوى

أصحاب برج السرطان زيهم زى أصحاب برج العقرب بيميلوا انهم يبعدوا عن الناس وانهم يبنوا جدار من العزلة حوالين نفسهم عشان محدش يقدر يقرب منهم، بس العقرب يبعد خوفا من الرفض لكن السرطان بيبعد عشان قلقان من انه يتعرض للأذى من أي شخص، ونقدر نقول ان الموضوع ممكن يوصل مع أصحاب برج السرطان للإصابة بالبارونيا او الشك والقلق من كل حاجة حواليهم.

برج الأسد (23 يوليو-23 أغسطس)
اضطراب الشخصية النرجسية

أصحاب برج الأسد دايما فخورين بنفسهم ومعندهمش مشكلة ابدا في انهم يشوفوا نفسهم أحسن من باقي الناس، بس من سوء حظهم كتر حبهم لنفسهم أحيانا بيزود عندهم اضطراب الشخصية النرجسية، اللي بيخليهم شايفين نفسهم أحسن من أي حد وانهم يستحقوا أفضل معاملة وان الناس كلها لازم تسمع كلامهم وتنفذ لهم كل اللي هما عاوزينة، ولو كنت تعرف حد من برج الأسد اكيد هتلاحظ صفة واتنين على الأقل من الصفات النرجسية دي في شخصيته.

برج العذراء (23 أغسطس-22 سبتمبر)
اضطراب الشخصية الحدّية

عمرك شفت حد من برج العذراء وهو بيتحول عليك في فترة الفركشة؟ لو شفت حد منهم في الفترة دي هتلاقيه سلبي جدا وحاد وكئيب خاصة في الفترة الأولى من فركشة العلاقة، وبيدخل برج العذراء ضمن دائرة الأبراج المصابة باضطراب الشخصية الحدّىة، ولأن أصحاب برج العذراء مش بيقدروا يعيشوا لوحدهم هتلاقىهم دايما على استعداد انهم يتحايلوا على الواقع ويعملوا المستحيل عشان يحافظوا على العلاقة اللي هما فيها، لو عرفت حد من برج العذراء هتعرف قد اية موقف الانفصال بالنسبالة بيكون صعب.

برج الميزان (23 سبتمبر-22 أكتوبر)
اضطراب الشخصية المدمرة للذات

أصحاب برج الميزان غالبا بيكونوا اشخاص لطاف جدا ومش حاسين بقيمتهم الغالية الحقيقية، ده غير كمان انهم غالبا بيكونوا اشخاص متواضعين جدا، دايما شايفين انهم ميستحقوش الفرح او الثروة او الحب، ونتيجة ده بيبقوا في الواقع ضحايا لاضطراب الشخصية المدمرة للذات وبيتشخصوا باضطراب الشخصية الانفصامية، وفى اغلب الأحيان الميزان بيكون أكبر عدو لنفسه.

برج العقرب (23 أكتوبر-21 نوفمبر)
اضطراب الشخصية الاجتنابى

تميل طبيعة العقرب الغامضة والسرية الى انه يبنى سور من العزلة حوالين نفسه، ومع اضطراب الشخصية الاجتنابى ممكن العقرب يوصل لأنه يتجنب المواقف الاجتماعية ويرفض انه يتواصل او يتكلم مع أي شخص، والعزلة دي بتخليه أهدى كتير وبتقلل الخوف اللى بيحس بيه.

برج القوس (22 نوفمبر-21 ديسمبر)
اضطراب الشخصية المعادية للمجتمع

أصحاب برج القوس بيحبوا المخاطرة جدا، وغالبا بيكونوا متهورين في تصرفاتهم، على الرغم من السحر الخاص اللي بيتمتع بيه أصحاب برج القوس الا انهم أحيانا بيستخدموا سحرهم ده في انهم يعيشوا أدوار كئيبة شوية، وبسبب طبيعتهم المتمردة ممكن يحصلهم اضطراب الشخصية المعادية للمجتمع نتيجة رفضهم الثوابت والقواعد العامة اللي بيعتبروها مش متناسبة مع شخصياتهم.

برج الجدي (22 ديسمبر-19 يناير)
اضطراب الكمال

اضطراب الكمال هو نوع من أنواع الوسواس القهري او ال OCD، بس اضطراب الكمال عند أصحاب برج الجدى غالبا بيرتبط معاهم بالشغل، والسلوك الصارم اللى بيتميز بيه برج الجدى بينعكس على شغلة بشكل كبير، وبيخلية في حالة من التوتر والقلق لو حس بس ان شغلة مش مظبوط بالظبط زي ما هو عاوز، عشان كدة أصحاب برج الجدى هما اكتر ناس معرضة للإصابة باضطراب القلق المرتبط بحاجتهم الى ان كل حاجة لازم تكون مثالية.

برج الدلو (20 يناير-18 فبراير)
اضطراب الشخصية الفُصامية

أصحاب برج الدلو هما أكثر الناس ابداعا، لكن لسوء الحظ على الرغم من ابداعهم المميز دة بتلاقيهم دايما ماشيين على خط رفيع فاصل بين العقل والجنون، ولما بيحاولوا يعبروا الخط دة بيتحولوا لأشخاص فصامية، والأشخاص المصابين بالفصام بيمليوا لتصديق معتقدات غريبة عن الطريقة اللي بتحكم العالم، زي مثلا القدرة على قراءة الأفكار اللي بتدور في عقول الناس، يعنى لو شفت من برج الدلو ولقيتة تاية في أفكاره الإبداعية الغريبة متستغربش ده العادي عندهم.

برج الحوت (19 فبراير-20 مارس)
اضطراب الشخصية الهستيرية

أصحاب برج الحوت حساسين جدا، خاصة تجاه رأى الناس فيهم، ونتيجة ءذءلكده بيظهر عندهم ادمان جذب انتباه الآخرين، وده طبعا بيخليهم سهل التأثير عليهم وبيكونوا أكثر عرضة للتقوقع في عالمهم الصغير الخاص بيهم، وكل الحاجات دي هي بالظبط خصائص الشخصية الهستيرية، ونرجع نقول ان الحيتان هما اكتر الناس ادمان لجذب الانتباه بكل ما تحمله الكلمة من معنى.

تعليق
  1. karas emad يقول

    مش بصدق الأبراج 🙂

    1. أحمد الفرماوي يقول

      المقال ساخر 🙂

اترك تعليق