هوس الثرثرة: ازاي تتعامل مع سواق التاكسي الرغاي وتخليه يبطل رغي

المواعيد المهمة والشغل إلي بنتأخر عليه والمشاوير البعيدة، أي كان السبب إلي بيخليك تركب تاكسي، لكن لو حظك جه مع سواق عنده هوس الثرثرة وبيحب يرغي ويحشر نفسه في كل حاجة، طيب لو أنت مصدع أو مبتحبش الكلام عموماً، وحابب توصل من غير ما يحصلك صداع نصفي بسبب كلامه الكتير، هتفضل تقول يا ريت ما ركبت وتضايق نفسك أكثر أو تنزل وأحتمال متلاقيش تاكسي تاني في الزحمة ولا تفضل وتصدع أكثر، الحل بسيط لا هتصدع ولا هتنزل هتكمل الطريق معاه بشوية حيل بسيطة تخليه يقلل رغيه ..

ليه سواقين التاكسي عندهم هوس الثرثرة :

  • طبع فيه، بيحب الرغي ويتكلم ويتحشر في كل حاجة
  • عنده طاقة زيادة أو مشكلة مش لاقي حد يحكيها ليه، ما صدق حد ميعرفوش كل علاقته بيه أنه هينزل بعد شوية فقال يفضفض معاه
  • فيه مشكلة فعلاً تستحق تتكلموا فيها، حادثة في الطريق، ارتفاع وأنخفاض الأسعار الصبح، أنت شكلك مرهق
  • عايز ينام، سواقين كتير لما بيلاقوا نفسهم عايزين يناموا بيستخدموا الكلام عشان يفضلوا فايق وميعملش حادثة
  • متحرش، دا النوع إلي بيلاقي بنت فيفضل يرغي معاها لمجرد فتح موضوع وخلاص

أزاي أقلل من هوس الثرثرة عند السواقين :

1- خد وأدي معاه : لو أنت بتحب الرغي أو بتحب تعرف عن الأحداث الجارية، أو عن الأحداث في المطلق وتسلي طريقك لحد ما توصل وتخرج طاقتك، أتكلم معاه وتفاعل معاه، مش بعيد يقلل ليك في الأجره بعد كلامك معاه

2-الرد المختصر : معلش، ممم ، طيب، ربنا يصلح الأحوال وان شاء الله، الجمل دي تنفع للرد على أي موضوع ووقتها هو هيبدأ ميلاقيش كلام يقوله ويقلل كلامه

3- الهاند فري : هيبدأ رغي حط سماعتك في ودنك محطتك الإذاعية المفضلة أو بلاي لست بتحبه، شغل أي حاجة مسليه وهز مخك على كلامه وخلاص

4-عايز تنام : أفضل أتاوب وغمض عينك وأخطف نوم خفيف بس خد بالك تمثيل، متنمش بجد بدل ما تتوه

5-تعبان : عندك برد ماسك منديل وأقعد أعطس أو كح كل شوية، نفسك غامة عليك، المهم متديش فرصة يفتح بوقه

6- القرأة: خلي معاك كتاب في شنطتك في موبايلك، أول ما تركب أبدأ أقرأ فيه

7- خلص شغلك: فرصة الطريق طويل طلع الشغل وراجعه أو أحفظه أو عيد فهمه وصياغته، ممكن تقرأ المقال دا عشان ضغط الشغل الضغط النفسي في الشغل : كل حاجة وليها حل كمل شغلك

8- مكالماتك : استغل طول الطريق وطلع الموبايل أطمن على كل الناس، ولو محدش بيكلمك، كل ما يتكلم أعمل أن الموبايل بيرن وقوله ثواني

شاركنا بأكثر المواقف المضحكة مع سواق التاكسي الرغاي؟

اترك تعليق