ازاى تقدر تتعامل مع الوحدة والبانيك أتاك (أو نوبات الهلع)

الوحدة بتخلى الشخص منعزل ومش عاوزة يندمج فى المجتمع، دة غير انة بيكون حاسس بالانفصال عن العالم وان الناس اللى حواليه مش متقبلينة، على الرغم من انه بيتمنى يشارك أكثر في الحياة الاجتماعية ويستمتع بصحبة الناس اللي بيحبوة ويفهموة، ومعظم الناس بيمر عليهم إحساس الوحدة من وقت للتانى، بس إحساس الوحدة بيكون حاجة أساسية في حياة الناس اللي بيعانوا من اضطراب الهلع او رهاب الخلاء، دة غير ان دايما الوحدة مرتبطة بالاكتئاب، وتعتبر الوحدة اضطراب نفسي منتشر جدا.

والوحدة عادة بتصاحب اضطرابات المزاج والقلق، لأن في ناس كتير من اللي بيعانوا من اضطرابات الهلع بيخافوا ان الناس اللي حواليهم يعرفوا حاجة عن مرضهم ده، وبيكونوا مكسوفين من الاعراض اللى ممكن تحصلهم خلال نوبات الهلع، وفى دراسات كتير بتقول ان اضطراب الهلع بيخلى المصاب بيه دايما حاسس بالخزي والعار.

وزى ما قلنا دايما ان الناس اللي بيعانوا من اضطراب ونوبات الهلع ورهاب الخلاء أكثر عرضة للتعرض لمشاعر الوحدة، لكن في طرق كثيرة من خلالها نتجاوز المشاعر دي ونقرب اكتر من الناس، وهنقولك على شوية نصايح ممكن تساعدك في الموضوع ده.

ليه وإزاي لازم تحمي نفسك من الأضرار السلبية للوحدة

تقنيات الرعاية الذاتية هي اكتر حاجة ممكن تساعدك على تحسين صحتك بشكل عام، يعنى هتساعدك تحسن صحتك الجسدية والعقلية والروحية العاطفية، واهتمامك ده اكيد هيزود ثقتك بنفسك، وأنشطة الرعاية الذاتية هتقلل شعورك بالوحدة وتقلل الاعراض اللي بتحصلك اثناء نوبة الهلع، وكمان التمارين البدنية اللي هتعملها هتقلل هرمونات التوتر وألم العضلات، الموسيقى كمان ممكن تحسن مزاجك وتبعد الأفكار السلبية عن دماغك، كمان الاسترخاء هيساعدك تسيطر على مشاعر القلق اللى بتحس بيها، كل ما هتهتم بنفسك اكتر هتقلل مشاعر الوحدة اللى بتحس بيها.

الوحدة مش معناها إنك متشاركش في الحياة بطريقة إيجابية

عشان تتغلب على مشاعر الوحدة اللى بتجيلك لازم تشارك في مجموعات او فصول او نوادي او منظمات عشان تقدر تكون وسط الناس، ولو بتحب أنشطة معينة زي القراءة او التصوير ممكن تشارك في أي احداث اجتماعية فيها الانشطة اللى بتحبها، تقدر كمان تروح مكتبة عامة او جيم او مكان لتعليم أي حرفة يدوية وتقدر كمان ممكن تحضر أي اجتماع ديني، لو دورت على الانترنت هتلاقى مجموعات كتيره جدا في بتهتم بأنشطة زي الخياطة او المشى او تسلق الصخور، حاول تشارك معاهم في الأنشطة اللى بتفضلها.

وممكن كمان تلاقى مجموعات على الانترنت في المنتديات او الدردشات تعرفك على اشخاص من كل انحاء العالم، والمجموعات الافتراضية دى هتكون أحسن حل بالنسبالك لو كنت بتتكسف تقابل الناس وتتعامل معاهم وجها لوجه، او لو كنت بتقلق من التواجد مع الناس لأي سبب نفسي تانى زي الخوف من الأماكن المقفولة او اضطراب القلق الاجتماعي.

مجرد بحثك عن المجموعات دي والاشتراك فيها فأنت بتساعد نفسك عشان تتجاوز مشاعر الوحدة، وكمان من خلال المجموعات هتقدر تتعلم مهارات جديدة وتشارك شغفك مع ناس تانية تفكيرهم قريب منك وهيبقى عندك انتماء أكبر للمجتمع، ودي هتكون امتع طريقة تتغلب بيها على إحساس الوحدة.

تحس بالوحدة والسعادة أحسن من انك تبقى وحيد ومتضايق: ساعد الناس 

عشان ترتبط أكتر بالعالم اللي حواليك لازم تفكر في التطوع لصالح أي قضية، واكيد هتلاقى حواليك مجموعات كثيرة مهتمة بفكرة التطوع منها اللي بيساعد في بنك الطعام ومنها اللى بيرعى الحيوانات او اللي بيجمع تبرعات للجمعيات الخيرية، من خلال العمل التطوعي هتقدر تنشغل عن شعورك بالوحدة وهترتبط اكتر بالناس اللي حواليك.

انت كمان ممكن تفيد الناس حواليك وتعلمهم المهارات او المواهب اللى عندك، يعنى لو كنت شاطر في الرسم مثلا او أي نشاط تاني ممكن تعلم غيرك وتساعده انه يتعلم مهارة جديدة، ولو دورت حواليك هتلاقى ناس كتير برضة بتعانى من الوحدة وممكن تكون محتاجة لمساعدتك سواء من الجيران او المسنين وكبار في السن اومن الامهات وربات بيوت.

وكمان لو ربيت حيوان اليف ممكن تحس بالونس وتنسى الوحدة، تربية قطة او كلب هتحسسك بالحب والرحمة وكمان ممكن وانت بتمشى الكلب تتعرف على ناس جديدة من منطقتك.

خلى حواليك ناس ممكن تساعدك لو اتعرضت لاضطراب هلع

وجود ناس حواليك تقدر تساعدك لما يحصلك اضطراب هلع هيقلل احساسك بالوحدة وهيساعدك على التعافي، ممكن الناس اللي حواليك يكونوا من المتخصصين او من الناس اللي بيحبوك، ودة هيخليك تقدر تتأقلم وتخطط للعلاج، وهيكون ليه تأثير إيجابي على تطورك للأفضل، حاول كمان تقرب من الناس اللي بيمروا بنفس حالتك لانهم بيكونوا فاهمين مشاعرك جدا وهما أكتر الناس اللي ممكن يساعدوك، وممكن توصل للناس دول من خلال العلاج الجماعي، وممكن كمان تحصل على دعم افتراضي من خلال منتديات الدعم على الانترنت، وخليك فاكر معاناتك من اضطراب الهلع مش معناها انك تعيش وحيد.

اترك تعليق