إدمان الترامادول: كل اللي محتاج تعرفه عنه باختصار

لو كُل معلوماتك عن الترامادول إنه مُخدر فده مش صح، الترامادول هو مادة أفيونية بيستخدموه أثناء علاج الأمراض المُزمنة لإنه علميًا بيرتبط بالمُستقبلات الأفيونية في الدماغ فبيمنع امتصاص النوربينفرين” الهرمون اللي بيزود قوة تقلص العضلات” والسيرتونين”الهرمون المُؤثر على العواطف والمهارات الحركية” وبكِدة بيخفف من الشعور بالألم في الجِسم،ممكن يكون بِرشام أو كبسولة طويلة المفعول وقوة فعاليته بتظهر من ٤ ل٦ ساعات، ومع كدة فهو أضعف من المواد الأفيونية التانية زي الهيروين.

تأثير الترامادول على المزاج

  • الشعور بالراحة.
  • الاسترخاء.
  • الارتباك.

تأثير الترامادول على الجسم

  • انتهاء الألم
  • الإمساك
  • التنفس ببطء
  • الدوخة
  • الإعياء
  • الصُداع
  • الغثيان
  • العرق الشديد

 الاعتماد على الترامادول كعلاج مش الإدمان

الاعتماد على الترامادول كمُسكن أو كعلاج مؤقت للألم في حالات زي السرطان مثلًا مش إدمان، وده لإن الإعتماد عليه كعِلاج متوقف على الشعور بالألم اللي بتطلّب من الترامادول يسكّنه، ولكن الإدمان حالة بتطلب نفس الشعور المُصاحب ليها طول الوقت وصعب جِدًا إنك تسحب نفسك من أثر المُخدّر عليك مهما كانت الخساير.

 علامات إدمان الترامادول

  • استخدام المُخدّر -أيًا كان نوعه- بشكل مُنتظم.
  • طلب كمية أكبر من المُخدّر لتحقيق نفس التأثير.
  • توفّر المُخدّر في متناول اليد أغلب الوقت.
  • تغيُر الأولويات، ودفع الفلوس الضرورية على المُخدّر.
  • الفشل سواء في الدراسة أو الشغل أو العلاقات الإجتماعية.
  • استخدام المُخدّر بغض النظر عن أضراره الواضحة.
  • تغيُر السلوكيات واللجوء للعُنف عشان الوصول للمُخدّر.
  • المُخاطرة بالنفس في سبيل الحصول على المُخدّر.
  • تضييع الوقت في التدوير على المُخدّر.
  • محاولات متكررة من التبطيل والفشل فيها.
  • المُعاناة من أعراض الإنسحاب بمُجرد التوقف عن التعاطي.

سلوك مُدمن الترامادول

أي حد مُدمن بيحاول يخبيّ ده بأي طريقة بس فيه علامات هنقولك عليها تاخد بالك منها عشان تقدر تساعده زي:

  • هتلاقي شخصيته بتتغير خاصة مزاجه وبيزيد شعوره بالقلق.
  • سلوكه كمان هيتغير سواء هيبقى غامض جدًا أو عنيف.
  • التغيُر المُبالغ فيه في زيادة أو نقصان الوزن وانعدام النضافة الشخصية.
  • المشاكل الصحية المُستمرة زي الإرهاق والقلق.
  • الانطوائية.
  • الأداء الضعيف دراسيًا أو عمليًا.
  • ظهور المشاكل المادية.

إزاي تساعد مُدمن الترامادول؟

متوقعش إنك لما تواجه شخص بإدمانه إنه هيحضنك أول ما تقوله حاجة زي كدة، بالعكس ممكن يبعد عنك أو حتى يقطع علاقته بيك-مهما كانت درجة القُرب، فانت لازم تختار طريقة تناسبه في الكلام من غير ضغط وتقترح عليه العِلاج كحل مبدأي ولو رفض_وده وارد جدًا- ممكن تبدأ تاخده جلسات علاجية جماعية وتروح معاه أو تُطلب الدعم من مُتعافي مرّ بنفس تجربته الصعبة وهو هيساعدك بشكل أفضل.

إزاي تحمي نفسك واللي حواليك من الإدمان

لازم تِعرف إن الإدمان ده سِمّ، وخروج السِمّ من الجسم بياخد رحلة طويلة وشاقة وليها أعراض صعبة زي الحنين والوخز والقلق والارتباك غير إنه بيلخبط أي نفسية، فمعرفتك عن أعراض الإدمان وأعراض خروج آثاره من جِسمك كفيلة تخليك تخاف تجرب.

ولو انت أصلًا جربت وخايف تِرجع أو ليك حد عزيز مُدمن ومنفعتش الوقاية، فالعِلاج المُستمر هو وقاية الإنتكاس، لإنه بيتم بطريقة فيزيائية وفسيولوجية بتناسب خروج السِمّ ده من الجسم بطريقة متأثرش عليك أكتر من كدة، فانت لازم تبعد نفسك واللي حواليك عن أي مكان فيه السِمّ ده وتحاول تبقى مُحاط طول الوقت بالرياضة والرياضين والتجمعات وخطط المُستقبل اللي بتخلي عندك دافع تعيش بُكرة متضيعهوش.

ومش عايزينك تقلق لإن إحصائيات علاج الإدمان متفوقة على إحصائيات علاج أي مرض مُزمن تاني، فلو وقعت هتقوم مِنها يا بطل المهم إنك متستسلمش لليأس.

اترك تعليق