أهم أعراض الاكتئاب الجسدية والنفسية اللي لازم تاخد بالك منها

اللي لازم نبقى عارفينه ومتأكدين منه إن الاكتئاب و أعراض الاكتئاب مش ضعف أو حاجة سهل نتخلص منها، الاكتئاب أو الاضطراب الاكتئابي الحاد هو مرض حقيقي موجود وملموس وبيموّت عدد كبير من الناس كل يوم زيه زي أخطر مرض عضوي.

الاكتئاب مرض بيصيب الجسم زي ما بيصيب النفس. وبيأثر بشكل كبير على طريقة تفكيرنا وتصرفاتنا وبيكون السبب في كتير من المشاكل الجسمانية والعاطفية.

في كتير من الأحيان الناس اللي عندهم اكتئاب مابيبقوش عارفين ده أو واعيين لده أثناء حياتهم اليومية الطبيعية حتى لو الاكتئاب ده خلاهم مش حاسين إنهم مش عايزين يكملوا الحياة دي أساسًا

الكآبة، الإحساس بالحزن واليأس، وفقدان الاهتمام في الحياة، وعدم الاستمتاع بأي حاجة الشخص بيعملها، وطبعًا التفكير في الانتحار (مجرد التفكير).. كل دي أعراض نفسية مرتبطة جدًا بالاكتئاب، إلا أن الإحساس بيها مش بالضرورة يدل على أن الشخص ده مُكتئب، لأن الاكتئاب لازم ييجي معاه أعراض جسدية كمان.

أهم أعراض الاكتئاب النفسية

  • فقدان الرغبة في عمل الحاجات اليومية المعتادة
  • الإحساس بالعصبية والكآبة وانعدام الأمل
  • نوبات من العياط بدون أي سبب معين
  • صعوبة في اتخاذ القرارات
  • عصبية وقلق وزهق
  • حساسية مفرطة
  • إحساس بقلة القيمة
  • أفكار انتحارية أو محاولات للانتحار

اعراض الاكتئاب الجسدية كتير ومن أهمها:

  • الصداع اللي مالوش سبب عضوي وضعف العضلات
  • فقدان الشهية للأكل.
  • فقدان أو زيادة في الوزن بدون مبرر.
  • اضطرابات الجهاز العصبي، زي الإحساس بإنك عايز ترجع أو إنك ترجع فعلًا وآلام المعدة.
  • آلام المفاصل، وآلام الظهر
  • ضعف التركيز: يعني بطئ استجابة المريض للأحداث الخارجية
  • اضطرابات النوم: واللي ممكن تيجي في شكل أرق، وممكن العكس وأنه ينام لساعات طويلة، ممكن توصل لـ18 ساعة في اليوم، لكن نوم متقطع ومش مريح

وبتختلف أعراض الاكتئاب باختلاف نوعه

في أنواع كتير من الاكتئاب، منها: الاكتئاب التفاعلي، وبييجي للشخص اللي اتعرض لحادث مؤلم أو صدمة عنيفة كوفاة شخص عزيز عليه مثلا، وفيه الاكتئاب الكيميائي، وده باين من اسمه لأنه بيجي بسبب تغيرات في كيمياء المخ وبييجي معاه أعراض نفسية وجسدية في نفس الوقت، وبيندرج تحته أكثر من نوع، زي اضطراب الاكتئاب المبتسم اللي فيه بيحاول المصاب إنه يتماسك ويخفي مشاعر الحزن والكآبة بابتسامته.

أعراض الاكتئاب مختلفة بين شخص للتاني:

يعني مثلاً ممكن شخص عنده 26 سنة عنده اكتئاب يبقى عنده أعراض مختلفة تمامًا عن شخص تاني عنده 60 سنة..  وبرضه الأعراض بتختلف من الشخص للتاني حسب شخصية كل بني آدم وتعامله مع المرض فهتلاقي اللي عنده أعراض اكتئاب حاد واضحة جدًا وبتقول لأي حد بيتعامل معاه حتى لو مش متخصص إن فيه مشكلة.. وهتلاقي ناس تانية الأعراض شوية مختفية ومجرد مش مبسوطين.. وهتلاقي برضه اللي بيضحك وراسم ابتسامه مزيفة طول الوقت زي اضطراب الاكتئاب المُبتسم اللي اتكلمنا عليه فوق.

تعليق 1
  1. اسيا شاهين يقول

    كيف يمكن علاجه ازن ارجو الرد انا عرفت الاعراض وبدي الحل

اترك تعليق