٣٥ علامة هتلاقيها في أي علاقة مؤذية

84

مفيش علاقة حُب أو ارتباط مِثالية، بس فيه علاقة صِحية بتاخد بإيدك وبتحسسك بالأمان والسعادة والاحترام والحُرية وبتكون فيها على طبيعتك، وعلاقة بتستنزفك وتتعبك طول الوقت ودي اللي بنقول عليها العلاقة التوكسيك، ودي آخر حاجة ممكن تبقى مستنيها في حياتك العاطفية اللي المفروض تهون عليك اللي بيحصلك في باقي جوانب الحياة.

ولو انت شاكك في صِحة علاقتك، دول ٣٥ علامة بتقولك إن العلاقة دي توكسيك وهتدمرلك صحتك:

  1. بياخد منك بس: مع إن العلاقات قايمة على العلاقات بس هتلاقي إنك طول الوقت بتدي ومش بتاخد أي حاجة.
  2. بيستنزفك: بدل ما تحِس إنك مبسوط وعندك طاقة بتحس إنك مُستنزف ومش قادر تنجز أي حاجة.
  3. انعدام الثِقة: ودي أكتر حاجة ممكن تخرب أي علاقة.
  4. الجو دايمًا مشحون: فيه استعداد دايم لوجود خناقة في أي وقت.
  5. مش بيعمل واجبه ناحيتك: ومفيش أي علاقة بتمشي بطرف واحد بس.
  6. الحُكم المُستمر: دايمًا بينتقد أي تصرُف منك.
  7. الشك: مش بيسيب لنفسه ولا ليك فُرصة لوجود الثِقة بينكم.
  8. النرجسية: شايف نفسه دايمًا محور الكون ومش شايفك.
  9. بيصدرلك الطاقة السلبية: مفيش أي شئ إيجابي في العلاقة بالنسبة له ولا بالنسبة لك.
  10. قِلة التواصل: ومن غير التواصل مفيش علاقة بتستمر.
  11. مش بيحترمك: والاحترام المُتبادل هو شرط استمرار أي علاقة.
  12. بيتَجاهلك: والتجاهل دايمًا بيوصل رسالة واحدة وهي إنه مش عايزك.
  13. مش بيدعمك: مع إنك محتاج لوجود حبيب في حياتك عشان يدعمك أصلًا!.
  14. مريض بحُب السيطرة: وطول الوقت عايزك تكون تحت كِلمته وسيطرته من غير إرادتك.
  15. ملك الدراما: العلاقة كُلها نكد وحوارات من أقل حاجة.
  16. بيشتتك: وده هتعرفه لما تلاقيك بتغير رأيك وقناعاتك عشان تقدر ترضيه.
  17. التحديات المُستمرة: طول الوقت حاسس إنك في سباق وتحدي معاه ولازم حد يكسب.
  18. الشعور بالدونية: وده شعور بيحطك فيه شريك حياتك عشان تحِس إنه كتير عليك وإنك متستحقوش أصلًا.
  19. بيكَتفّك: مبتبقاش عارف انت مكمّل معاه عشان بتحبه بجد ولا عشان مفيش مَخرج من العلاقة دي؟
  20. اختبارات مُستمرة: طول الوقت لازم تختار حاجة قُصاد حاجة.
  21. حجج فارغة: دايمًا فيه حِجة مالهاش لازمة لتبرير موقف كبير.
  22. مش بيخليك متطمن: لإنك دايمًا حاسس إنك معاه على كف عفريت مش بتقدر تاخد اي خطوة لقدام.
  23. بيحسدك: ودي حاجة مش منطقية لإنه لو بيحبك هيفرح بنجاحك وتقدمك مش هيتمنى زوال نعمتك!.
  24. بيلغي شخصيتك: مع إن من حقك تقول لأ على أي حاجة مش بترضيك.
  25. بيحاسبك على ماضيه: وده بيعطّل أي خطوة لقُدام في علاقتكم.
  26. بيقلل منك: استحالة يعترف بقيمتك وطالما هو معترفش بيها مش هتقدر تشوف نفسك كويس أبدًا.
  27. بيخدعك: كُل شوية بيكذب عليك في حاجة شَكل.
  28. بيخليك حزين: هتلاقي إنك طول الوقت متضايق وده سبب كافي إنك تخلص من العلاقة دي.
  29. بيحرمك من الراحة: وطول ما انت مش مرتاح بتكون مش عارف انت عايز إيه.
  30. بيأثر على معاييرك: وبيخليك تقبل طول الوقت اللي مكنتش ممكن تقبله في يوم ولا تستحقه من الأساس.
  31. بتنطفي معاه: ومبتحسش إنك قادر تعمل أي حاجة في حياتك.
  32. بيخليك تغير مبادئك: ومفيش حاجة تستاهل تخليك تغير مبادئك عشانها.
  33. بيضايقك بالكلام: سواء بالنقد أو بالتقليل منك أو أي حاجة تغير مودك للأسوأ.
  34. بيطلّع أسوأ ما فيك: مع إن المفروض يخليك تبقى أحسن.
  35. مش بيعمل أي حاجة صح: وده بيأثر عليك فيخليك متعملش أي حاجة صح وتبقى العلاقة كُلها غلط في غلط.

العلاقات مُهمة والعلاقة التوكسيك دي بتكلّفك الوقت والطاقة اللي ممكن تستغلهم في حاجة أحسن ليك، عشان كدة متخدعش نفسك إنك فرحان وخلّص نفسك من أي حاجة ممكن تأذيك.

اترك تعليق