هل ينتهي الاكتئاب بدون علاج؟

208

الاكتئاب ممكن ييجي ويروح عند ناس، يعني في شكل نوبات. وفي ناس تانية بيحسوا أن أعراضه مكملة معاهم علطول. يعني مالصعب تعرف تجربتك مع الاكتئاب شكلها هيكون أي. لكن عمومًا لو كان اكتئابك شديد فمش هيروح من نفسه، وكمان احتمال يتكرر كتير، وعلشان كدا لازم علاج.

مفيش حاجة تخليك قاعد مستني الاكتئاب يروح من نفسه، دا مرض زي الأمراض التانية، ولازم تطلب مساعدة من دكتور متخصص. علشان تعرف أكتر عن اكتئابك وإزاي تعالجه. ومتخفش كتير من علاجات الاكتئاب مجرد عادات صحية، ومتزهقش طبيعي تاخد وقت لحد ما تلاقي العلاج المناسب ليك.

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب أونلاين

هل ممكن علاج الاكتئاب من غير مضادات الاكتئاب؟

كتير بيسألوا هو ينفع نتعالج من غير ما ناخد مضادات الاكتئاب، ودا طبعًا علشان بيخافوا من آثارها الجانبية. لكن الإجابة عالسؤال دا بتعتمد على شدة أعراض الاكتئاب وهي مستمرة ولا لأ.

الاكتئاب البسيط والمتوسط ممكن يتعالج من غير مضادات الاكتئاب، ويتعالج بالعلاج النفسي اللي هو العلاج بالكلام مع الدكتور، وممكن دا يتم بشكل فردي أو جماعي علشان تقدر تستفيد من خبرات غيرك. والنوع دا مالعلاج ممكن يعالج الأسباب الأساسية للاكتئاب زي، الحزن، والقلق، ومشاكل الطفولة، والتفكير السلبي، وعدم تقدير النفس، ومشاكل العلاقات. كمان العلاج بيساعد في تحسين مهارات التأقلم والمرونة. لكن الاكتئاب الشديد أو المستمر، بيحتاج للعلاج النفسي وكمان أدوية مضادات الاكتئاب.

علاجات ناجحة للاكتئاب الخفيف والمتوسط من غير أدوية

ناس كتيرة من اللي عندهم اكتئاب بسيط أو متوسط، ممكن يتعالجوا بشكل كويس بالعلاج النفسي، يعني الكلام مع الدكتور في شكل جلسات متابعة. وكمان بيحتاجوا لتغيير أسلوب حياتهم للأحسن، يعني يناموا حلو ، وياكلوا أكل صحي ، ويلعبوا رياضة. كمان ممكن يجربوا حاجات تساعدهم زي،؛ العلاج بالضوء،  والدعم من الأصحاب، والعيلة ومجموعة الدعم.

كمان لازم يستبعدوا أي سبب عضوي لاكتئابهم. لأن في مشاكل صحية بتأثر على المزاج زي، نقص الفيتامينات وتغييرات الهرمونية.علشان كدا مهم الشخص يعمل فحص على جسمه كله لاستبعاد أي سبب طبي. الحاجات التانية اللي ممكن تساعد في الشفاء زي الوخز بالإبر أو غيره من الأساليب الطبية البديلة أو التأمل أو اليوجا أو الاستكشاف الروحي.

خطورة عدم علاج الاكتئاب

الاكتئاب اللي مش بيتعالج بيسبب مشاكل خطيرة، وبيزود من خطورة الأفعال الغلط زي الإدمان وبيبوظ العلاقات بين أهلك وقرايبك وأصحابك. كمان بيسبب مشاكل في الشغل ولو حد مريض بيصعب عليه علاج المرض، لأن الاكتئاب بيخليه مش مهتم ياخد أدويته. الخطورة ممكن توصل للتفكير في الانتحار.

علشان كدا لازم تعالج الاكتئاب، هو مش شوية زعل وخلاص، لأ دا بيأثر على كل حاجة في حياتك حتى نومك وأكلك، ونظرتك لنفسك وللي حواليك وأفكارك. الاكتئاب اللي مش بيتعالج ممكن يستمر من أسابيع لسنين، لكن العلاج بيقلل الفترة وبيقلل حدة الأعراض. سواء كان علاج نفسي أو علاج بمضادات الاكتئاب.

تأثير عدم علاج الاكتئاب على الجسم

الاكتئاب اللي مش بيتعالج مش بس بيأثر عالنفسية، لأ بيأثر على أعضاء الجسم. يعني مثلًا الناس اللي عندها اكتئاب شديد وعندهم أمراض زي تصلب الشرايين بيقابلوا صعوبة في العلاج، ومش بيهتموا بتعليمات الدكاترة وبالتالي حالتهم بتسوء.

الرجالة اللي مش بيتعالجوا بيكونوا غضبانين ومحبطين وسلوكهم عنيف أكتر من الستات. كمان ممكن يسوقوا بتهور ويعملوا حوادث.

الاكتئاب اللي مش بيتعالج وتأثيره عالنوم

من أهم أعراض الاكتئاب تأثيره على النوم، ممكن يخلي الشخص ينام كتير أو يبقى عنده أرق ومش عارف ينام. فما بالك بالاكتئاب اللي مش بيتعالج، طبعًا بيزود صعوبة النوم. ودا بيفقد الشخص طاقته، ويخليه ميقدرش يركز أو ياخد قرارات. كمان بيزود مشاعر اليأس وغيرها من المشاعر الوحشة.

أعراض الأرق بسبب الاكتئاب اللي مش بيتعالج

  • التعب في النهار
  • صعوبة التركيز
  • النوم اللي مش كافي
  • صعوبة في النوم
  • صعوبة في أنك ترجع تنام لو صحيت بالليل
  • الصحيان كتير في الليل
  • الصحيان قبل المنبه

علامات تعاطي المخدرات نتيجة عدم علاج الاكتئاب

تعاطي الكحول والمخدرات حاجة مشهورة للأسف بين المصابين بالاكتئاب. وبالذات بين المراهقين والشباب والناس المتوسطة في العمر من الرجالة. لازم نساعدهم لأنهم أكتر عرضة لمحاولة الانتحار. علامات تعاطي المخدرات هي:

  • فشل العلاقات الشخصية
  • تعاطي الكحول
  • شفقة على النفس
  • ارتعاش
  • فقدان ذاكرة ملوش سبب
  • مش بيرضى يتكلم عن المخدرات أو الكحول

المراجع:

المصدر1
المصدر2
المصدر3

اترك تعليق