هي نوبة هلع ولا أعراض كورونا (Covid-19)؟

73

أوقات كتير لما ناس تجيلهم نوبة هلع، بتيجي شديدة جدًا ومخيفة لدرجة إن الشخص ممكن يروح غرف الطوارئ أو يتصل بطبيبه، عادة الاعراض بتستمر عشر دقايق وبعدين بتهدي بس في بعض الأحيان اعراض النوبات بيتم استفزازها من خلال مواقف كلنا عارفينها زي امتحان مهم أو إنك تطلع تتكلم قدام جمهور كبير، دا غير انها ممكن تحصلك أحيانًا من غير انذار أو من غير حافز واضح.

في دراسات بتقول إن واحد من كل أربعة هيصاب بنوبة ذعر واحدة على الأقل في حياته. نوبة الهلع مش خطيرة في حد ذاتها، بس أعراضها اكيد هتحسسك بكده. ودا بسبب إن الاعراض مشابهة جدا لأعراض النوبة القلبية.

لازم تستشير دكتور لو كان عندك أي تاريخ طبي مع:

  • أمراض القلب.
  • ارتفاع ضغط الدم.
  • ألم في الجزء الشمال من الصدر والذراع.

وأكيد هيكون أفضل لما تتحرج بعد الكشف وتلاقي إنك بخير وإنها مجرد نوبة هلع، من إنك تتجاهل نوبة قلبية محتملة (بعد الشر عليك).

ايه اللي حصل بداية انتشار جائحة كورونا؟

في بداية انتشار فيروس كورونا، نوبات الهلع بقت تضايق اكتر من الأول، ليه؟  اكتشفوا إن بعض اعراض نوبات الهلع وبالتحديد صعوبة التنفس والخنقة أو وجود ضغط على الصدر، شبه أعراض فيروس كورونا (covid-19)، ممكن تحس بقلق مستمر إن اللي عندك دي اعراض الفيروس ودا اللي بيخلي نوبة الذعر أسوأ.

إيه الفرق بين نوبة الهلع وأعراض فيروس كورونا؟

الفرق اللي واضح وضوح الشمس هو أن نوبة الهلع بتيجي وتختفي بسرعة زي ما قولنا هي بتدوم حوالي 10 دقايق حتى لو مش بتحس بالوقت لما تجيلك، لكن أعراض كورونا بتتطور فيها الآثار الجانبية الشديدة على مدار كذا يوم.

كلنا عدى علينا قصص بعض المصابين بالفيروس، إنهم قعدوا في البيت وانهم اتحكموا في نفسهم، في حين إن ناس تانية على طول بتبقى محتاجة تروح المستشفى بسبب الاعراض الشديدة.

وقصص ناس بيوصفوا شعورهم بتحسن أثناء النهار وانهم بيكونوا أسوأ بكتير بالليل. أي سيناريو من دول ممكن يزود مخاوفك وذعرك خلال نوبة الهلع.

إزاي نفرق بين نوبة الهلع والأعراض المحتملة لـ لفيروس كورونا؟

اكتر شيء مهم لازم تاخد بالك منه هو مستوى تكرار الاعراض اللي بتجيلك، وتعرف إن نوبة الهلع هتعدي خلال 15 أو 20 دقيقة بالكتير، لكن فيروس كورونا دايما أعراضه هيصاحبها الحمى والسعال، والأعراض دي عمرها ما بتحصل مع نوبات الهلع.

أحسن حاجات ممكن تعملها لما تجيلك اعراض النوبة:

  • فكر نفسك دايما بأن المشاعر المخيفة دي هتعدي بسرعة.
  • لو حسيت بضيق تنفس حاول تتنفس في كيس ورقي؛ لإنه هيساعد انه يلهيك عن النوبة.
  • لو في شخص حواليك اطلب مساعدته في انه يطمنك يحاول يطبطب عليك او يبقى جمبك، وممكن الشخص دا يفكرك إنك تكمل تنفس وإنك هتتحسن خلال دقايق.

وزي ما قولنا أعراض نوبات الهلع مش منتشرة، وإن في ناس اكتر عرضة ليها من ناس تانية، لكن لازم كلننا نكون على أتم استعداد للمخاوف اللي ممكن تصيبنا بخصوص فيروس كورونا. كلنا بنسأل نفسنا خلال يومنا: هو انا زوري واجعني؟ لا دا أنا عطست، ولا يمكن عندي بس شوية صداع أو سخونية، فكر نفسك دايما انك بخير وحاول تشتت انتباهك بدل ما تفضل قاعد قلقان، قوم وحرك جسمك حتى لو بس هتروح المطبخ تشرب كوباية مياة، لأن في معظم الأوقات الخوف بيعدي.

هل جاتلك نوبة هلع أو لحظات حسيت فيها بقلق شديد بخصوص احتمال إصابتك بفيروس كورونا؟

Summary
اترك تعليق