هل نوبات الهلع ممكن تسبب الإغماء؟

106

القلق والخوف بيكونوا سبب في أعراض كتير مخيفة، ناس بتشوف أن الأعراض دي مستحيل تكون قلق، دا اكيد مرض خطير ولازم اكشف، الحقيقة أنه فعلا مش مألوف إن تحصل حالات اغماء أثناء نوبة الهلع،  للاسف الدكتور لوحده هو اللي ممكن يشخص سبب الإغماء، وانك تشخص نفسك عن طريق الانترنت شي خطير، لازم الاول تكلم دكتورك، بس لو عايز تعرف الرأي الطبي فا أيوة القلق سبب شائع في الشعور بالإغماء.

لكن نادر جدا أن نوبات الهلع تسبب الإغماء فعلاً، لكن ممكن يحصل مع حالات نوبات الهلع الشديدة أنه يغمى عليك أو فعلا تحس انك خلاص غبت عن الوعي، وبنشوف أن نوبات الهلع اللي بتحصل بسبب فوبيا شئ معين دي طبيعي انها تسبب الإغماء، لكن نوبة الهلع دي اعراضها بتكون مختلفة عن النوبات التقليدية المفاجأة اللي بتحصل لشخص مصاب باضطراب نوبات هلع لأن الأشخاص اللي عندهم اضطراب أو بيجيلهم نوبة مفاجأة مش هيوصلوا لدرجة الاغماء.

بس هل نوبات الهلع فعلا بتسبب الاغماء؟ 

  • لازم قبل اي حاجة تعرف إن الإغماء ممكن جدا أنه يحصل في حالات القلق الشديدة.
  • مش شائع مع نوبات الهلع ومع ذلك بيفضل في الشعور بالإغماء، إنك تبقى دايخ وحاسس كأنه هيغمى عليك.
  • معظم حالات الاغماء اللي بتحصل خلال نوبة الهلع بيكون سببها عدم انتظام التنفس.
  • اكيد مرجح يحصل لكن دا حسب حالة الشخص وأعراض النوبة اللي بتجيله.

أسباب  الإغماء-أو شعور الإغماء؟

خلينا نناقش ايه اصلا اللي ممكن يخليك يغمى عليك أو تحس “كأنه” هيغمى عليك، احنا خلاص اتفقنا إن شعور الاغماء أمر شائع لانك بتحس فيه بانك دايخ ودماغك تقلت وجسمك بدأ يسيب (ودي حرفيا كلها جزء من أعراض نوبات الهلع)، بس برضو لازم تعرف ايه هي أكثر الأسباب الشائعة للإغماء خلال نوبة الهلع:

فرط التنفس

ودا اكتر سبب شائع، وفرط التنفس بيحصل لما تتنفس بسرعة كبيرة لانك وقتها بترجع تستنشق ثاني اكسيد الكربون اللي بيسبب تضييق في الأوعية الدموية وخصوصا الأوعية الدموية للدماغ وهو دا اللي بيخليك تحس بالدوخة وسيبان في الجسم، ودا اول سبب للشعور بالاغماء خلال نوبات القلق.

  الأدرينالين

الادرينالين نفسه مبيسببش اغماء لكنه بيسبب الأعراض دي: زيادة نبضات القلب، ضيق في الرؤية، وان جسمك متشعلق في الهوا، ولأن الادرينالين مسؤل عن القلق نفسه، وممكن وانت خايف الادرينالين يبقى أيده في ايد القلق كده عشان يخلوك يغمى عليك.

السكتة دماغية

متتخضش من اسمها احنا مش قصدنا متلازمة السكتة الدماغية (بعد الشر عليك)، لكن اللي بيحصل أثناء القلق والخوف إن في أجزاء من دماغك فعليا بتقفل  أو بتسكت (أو بتبقى بطيئة) وخلال النوبة عقلك مبيبقاش شغال كويس وده اللي بيخلي أعراض شعور الإغماء تظهر.

المشاعر الفياضة

من الأعراض الجسدية انك بتبقى حساس اوي، مش قصدي مرهف المشاعر لكن هتكون حاسس بكل عرض من أعراض النوبة بقوة أكبر بكتير من الناس اللي مش بتجيلهم نوبة هلع، يعني بمعنى اصح مشاعرك بتضخم، وكل ما بتحس بقلق أو دوخة مش بس هتحس انك هيغمى عليك، انت ممكن تفكر انك بتموت.

ازاي أوقف شعور الاغماء؟

متفهمين طبعا إن بمجرد ما نوبة الهلع بتبدأ بيكون صعب جدا السيطرة عليها، فا خلي اول فكرة تيجي في بالك هي انك تنظم نفسك عشان متتعرضش نفسك لفرط التنفس، حاول تبطأ تنفسك:

  • خد شهيق لمدة خمس ثواني.
  • خليك كاتمه ثانية او اتنين.
  • وبعدين خرج الزفير ببطء شديد على 7 ثواني.
  • وحاول تعد الثواني دي في مخك عشان تشغلك عن أعراض النوبة.

نفسك المنظم مش هيخفف الاعراض ومش هيخلي النوبة تعدي فورا ولكن انت بتحاول تطمن نفسك إن داخلك اكسجين بشكل كويس ودا مش هيعرضك لتضييق في الاوعية الدموية أو فرط تنفس ومش هيحصلك مضاعفات أو فقدان وعي.

وأفضل نصيحة بنوجههالك انك تعرف اكتر عن نوبات الهلع والأعراض وطرق علاجها.

اترك تعليق