ساعد نفسك

علاج الاكتئاب بدون دواء : تعملها إزاي دي؟

علاج الاكتئاب بدون دواء : تعملها إزاي دي؟

هنا هنحاول نقول علي شويه خطوات عن علاج الاكتئاب بدون دواء ، لأن من المعروف إن أي دوا بنخده ليه آثار جانبية علي المدي البعيد وآثار وقتيه كمان حتي المسكنات العبيطة زي الأسبرين وغيرها، غير أن كمان مضادات الاكتئاب بتغير كيميا المخ وليها تأثيرات تانية علي العلاقة الجنسية زي ما قلنا قبل كده.

وعشان نتخلص من الاكتئاب نهائيا ودا هدف أي حد بيعاني منه، إلا أن فيه ناس كتير بتقع في الفخ وبتفضل تقول أنا مش بأيدي حاجه أعملها وتفضل تنزل تنزل لحد ما توصل للقاع مرورا بمرحله اليأس والإحباط وغيرها، لكن في الحقيقه الشخص نفسه هو الوحيد اللي ممكن يساعد نفسه دا طبعا لو الموضوع لسه في أوله زي أنه يحاول يكتشف طرق للعلاج من غير ما يضطر إنه ياخد أدوية اللي هي مضادات الإكتئاب.

وهنا هنقولك عشر خطوات لو عملتهم كلهم هتقدر تعالج نفسك الاكتئاب من غير أدوية أولهم مثلا وهنقولهم بالتفصيل بعدين زي مثلا أنك تغير عاداتك، ونظام حياتك، و طريقة تفكيرك، ووفيه كمان شوية وسائل بسيطة وممكن تساعد في التخلص من الاكتئاب نهائيا.

  • حط روتين لحياتك

الاكتئاب بيشل الحواجز بين الأيام فا بيخليها تبقي كلها شبه بعضها، لا تعرف الخميس من الجمعه من السب من أيام الأسبوع كلها، وده طبعا ملل السنين، عشان كده لو كنت مكتئب الخبراء والأطباء بينصحوا إن الشخص يعمل روتين ثابت لليوم وتلتزم بيه عشان ما يحصلش انك مش حاسس بمرور الأيام وتعمل جدول لأعمالك وتلتزم بيها.

  • حط أهداف تساعدك أنك تتخلص من الاكتئاب نهائيا

لما تصاب بالاكتئاب ممكن تحس بأنك مش قادر تنجز أي شئ في حياتك حتي أمورك البسيطة، وده طبعا بيزود البله طين يعني بيخلي الحالة تبقي أسوأ اكسر الدائرة المفرغة دي و حط أهدافاً يومية لنفسك، ابدأ بأهداف بسيطة و سهلة ثم بعد كده طورها لأهداف أصعب.

  • مارس الرياضية

ممارسة الرياضية بيساعد الجسم علي أنه يفرز مادة كيميائية طبيعية في الجسم أسمها الإندورفين و ده الهرمون اللي يعلي المزاج أو بيحسنه، وأنت هنا مش محتاج رياضه عنيفة ولا حاجه أي رياضاه والسلام حتي المشي كل يوم نص ساعة بس وهتحس بالفرق سواء علي مستوي صحتك النفسية والجسدية.

  • كل أكل صحي وأبعد عن أكل الشارع لو عايز تعالج نفسك صح

مفيش نظام غذائي سحري ممكن يساعدك في أنك تتخلص من الاكتئاب نهائيا، بس نوعية الأكل اللي بتاكله ممكن تساعدك أن مزاج يبقي أحسن وصحتك كمان، وفيه برضه أكلات ممكن تعك الدنيا أكثر وتخي مزاج زفت لا قدر الله، ده لأن الاكتئاب بيخلي الشخص ياكل بزياده وده طبعا بيأثر علي الشكل وعلي الاكتئاب نفسه لأن الأكل الزيادة محلش المشكلة، وفيه دراسات قالت إن الأكلات اللي فيها أحماض الأوميجا 3 الدهنية  زي السلمون، التونة،  و الأكلات اللي فيها حمض الفوليك زي السبانخ و الأفوكادو ممكن تحسن الحالة المزاجية.

  • نام كويس وخد كفايتك من النوم

الاكتئاب بيخلي الشخص مش عارف ياخد كفايته من النوم ودايما عنده أرق، دا غير أن أساسا النوم القليل بيزود الأكتئاب، هنا بقي هتمل ايه ، من الأفضل أنك تغيّر نظام حياتك و تحاول تروح تنام في معاد محدد وتصحي في معاد محدد ، وحاول ما تخدش غفوة كده وسط اليوم اللي هي القيلوله ، خرج التليفزيون أو الكمبيوتر أو الموبيل من الأوضه بتاعتك وأنت داخل تنام.

  • اتحمل المسؤولية

لما يبقي عندك اكتئاب ممكن تحس أنك عايز تطفش وتهرب من المسئوليات اللي في حياتك زي الولاد والشغل وغيرها من الأمور الحياتيه اللي بقينا مكلفين بيها، هنا من الأفضل أنه ما يحصلش استسلام للشعور ده وتحاول تواجهه وتتحمل مسئولياتك،وتستمر ي أنك تختلط بالناس ما تتجهش للعزله،  ومارس المهام اليومية المعتادة ده هيساعدك علي أنك تتخلص من الاكئتاب نهائيا ، انزل الشغل سواء دوام كامل أو جزئي أو حتى عمل تطوعي.

  • اتحدي أفكارك السلبية

نص الطريق اللي بيساعد على التخلص من الاكتئاب نهائيا ممكن تقطعه بمعركة ضد عقلك أنت، غير طريقة تفكيرك، ما تلجأش للتفسيرات السيئة واسمع كويس للمنطق، لو حسيت أنك مش  محبوب مثلا دور علي الدليل المادي لده، والسلوك ده هيحتاج شوية تدريب، لكن هيخلي كل أمورك تحت السيطرة.

  • ارجع لدكتورك لو هتاخد أدوية أو مضطر لكده

لقوا أن بعض المكملات الغذائية ليها دور في معالجه الاكتئاب دا طبا بعيدا عن مضادات الاكتئاب المعروفة، بس طبعا قبل ما تتجه لأنك تاخد مكملات غذائية ارجع لدكتورك زي مثلا المكملات اللي فيها حمض الفوليك و زيت السمك.

  • أعمل حاجه جديدة

زي مثلا العمل التطوعي، اتعلم لغة جديدة جرب حاجه مجربتهاش قبل كده،كل ده هيخلي جسمك يفرز هرمون  الدوبامين اللي ليه علاقة برضه بالمزاج والسعادة.

  • حاول أنك تستمتع

حاول أنك تلاقي حاجه ممتعه بتحب إنك تعملها، ولو حسيت أنك يومك ممل ومفهوش أي تجديد ما تقلقش دا عرض من أعراض الاكتئاب، بس المهم ما تتوقفش عن المحاوله وتستسلم لليأس والأحباط.

في النهاية  الإحباط و اليأس و الاكتئاب مش هيحلوا المشكلة لكن لو ما عملناش اللي علينا هننزل للقاع زي ما قلنا لحد ما نوصل للوحدة و الانعزال، عشان كده بنقولك عافر وهتوصل.

عن الكاتب

حنان جمـال