شد الفيشه عن اقتناع وإنت الكسبان

المشاعر الانسانيه على قد ما هى بتتحس بسهوله من غير تجهيز، معقده فى الكيميا بتاعتها، اى تغيير بسيط فى المعادله هيفركش التركيبه كلها و يبوظها.
مع شوية تراكمات و جايز العشره الاطول، ممكن حاجه كبيره اوى جواك لناس فى حياتك تتهز و تضعف و ممكن تموت خالص، بمعنى تانى كلنا عدى علينا انواع من الناس كان فى بينا و بينهم تيار كهربا مستمر، بس مع ملاحظة تصرفات الناس دى، بتلاقى نفسك شديت الفيشه خالص و انت مقتنع.

لو في محيطك حد عنده ولو صفه واحده من الجايين دول، شيله من دايرتك فوراَ و انت الكسبان، مش قلة اصل خالص علي فكره:

  • اللى مش بيقدر مجهودك و وقتك او مساعدتك، مهما عملت مش هيشوفك، و عند اول ملف هينزلك مهما كنت محتاجله او طلبت مساعدته.
  • اللى ماعندوش حاجه ليها تمن، بالبلدى بيسموه بتاع الكل، يحسسك انه بيديك حاجه ليها قيمه و مهمه و هي فى الحقيقه متاحه للكل، ماعندوش حاجه ليها قيمتها، سواء كلام او افعال، اى حد ممكن ياخد منه اى حاجه، كل حاجه مستباحه.
    المعروض كتير دايما رخيص و انت تستاهل حاجه ليها تمن.
  • اللي مش جدع، او واخد جدعنتك حق مكتسب فبطل يبقى هو الجدع. مش بيسندك غير لما يكون الوقت مناسب ليه.
  • اللى اول ما هتاخد جنب و تبعد عنه، ممكن يتشقلب عشان يجيبك فى صفه تانى، بس برضه عمره ما هيكون واضح و لا هاتفهم هو عايز منك ايه.
  • اللى مالوش مسكه، يوم يكون كويس جدا معاك و يشيلك من على الارض، و يوم يقلب بمزاجه لانسان تانى، و يسيبك مع نفسك مش فاهم حاجه.
  • اللى متلاعب بالكلام و التصرفات و مش عارف يثبت علي خط، و لا عارف عايز ايه و لا عايش ليه.
  • اللى يحب اوى وجودك عشان يسمع كلام كويس عن نفسه و يحس انه مهم و و قد ايه انت بتقدره، كلامك بيخرج من ودنه التانيه و مش بيسيب اى اثر جواه ناحيتك، هي مسألة حب ذات مش اكتر.
  • اللى مافيش عنده جرأه يصدك بوضوح او يلزمك بحدود معينه، بيتسلى على لخبطتك.
  • اللى مدعى الثقه فى النفس، بتبان انها مش حقيقيه و حواليها دوشه مش طبيعيه و عدم اتزان و بوظان متراكم.
  • اللى فقد القدره على التفرقه بين الطيب و الخبيث.
  • اللى مكدبك مهما تعمل و تقول، الشكاك و مفترض فيك سوء النيه، القاعده الانسانيه بتقول ان الكداب بيكون مفترض ان كل الناس كدابه.
  • اللى مركز في نفسه ، محور الكون بتاعه احتياجاته ، مزاجه، نفسيته، رغباته، زعله و فرحته هو بس.
  • اللى يوصلك لندم رهيب انك فتحت له قلبك او وريته ضعفك.
  • اللى ما طلعش بنفس جمال البرواز الى حطيته فيه.
  • اللى ماتحبش نفسك و انت معاه.
اترك تعليق