ابني حركته كتير وتركيزه قليل: الحل أيه؟

كلنا عندنا الطفل الشقي اللي مبيفضلش في مكان دقيقة على بعضها،بيجري ويتنطط في كل مكان،  والأمهات دائماً  بتخاف يكون فرط الحركة عند أبنها نوع من أنواع التوحد أو نقص الانتباه .. طيب أزاي نقدر نفرق بينهم ونعرف نتعامل مع كل حاجة منهم يبقى لازم تقرأي المقال دا عشان مكتوب مخصوص ليكي ياللي أبنك الشقي مطلع عينك 😀

خلي في بالك أن مش شرط شقاوته وحركتة كتير يكون عنده توحد، ممكن يكون طاقة زيادة عاوز يخرجها.. فساعديه على دا

ولو توحد متقلقيش الأكتشاف المبكر للموضوع بيعالجه.. المهم نعرف نتعامل مع أطفالنا حسب شخصيتهم

أول حاجة أعراض فرط الحركة:

  1. مبيقعدش هادي أبداً مدة طويلة في مكان واحد بيلف حوالين نفسه زي النحلة رايح جاي
  2. اللعب بصوت عالي جداً على طول حتى لو اللعبة هادية زي الرسم
  3. رغاي
  4. قاعدة مع قرد في البيت بيطلع فوق أي حاجة وعلى أي حاجة

التعامل فرط الحركة :

  1. خليه يشترك في رياضة بدنية، يخرج فيها كل الطاقة الجسدية اللي عنده
  2. بلاش السكريات والمعجنات لأنهم بيزودوا الطاقة  وهو مش ناقص
  3. ممنوع الضرب على الرأس والوش، بصي هو ممنوع الضرب كعقاب ليه على فرط الحركة في المطلق لأنك كدا هتخليه طفل عنده فرط حركة وعنيد ومبيسمعش الكلام

ثانياً أعراض التشتت ونقص الإنتباه:

  1. مفيش تركيز، أو تركيزه ضعيف دقايق على حاجة معينة وبعدها يلتفت لحاجة تانية
  2. بينسى كتير
  3. بيكرر الغلط اللي بيتقوليله عليه أكثر من مرة ميعملوش لأنه بينسى ويرجع يعمله
  4. مبيخلصش حاجة بدأها زي طبق أكله وواجباته
  5. بيضيع حاجته دائماً بسبب الفوضى

التعامل مع تشتت الإنتباه

  1. رتبي كل حاجتة بألوان كتير، واجب الرياضة باللون الأخضر، واجب العربي باللون الأحمر
  2. وقت المذاكرة حطي على المكتب الأدوات اللي هيستخدمها وبس زي قلم واحد ومسطرة واحدة وهكذا عشان ميشتتش إنتباه لما حاجة منهم تقع
  3. هاتي ليه ألعاب الذكاء، مكعبات، صلصال، حتى لو ألعاب إلكترونية بتنمي الذكاء “تابعي صفحة العاب فرافيرو و صفحة ايناس و الأطفال”
  4. نظمي وقت للمذاكرة ووقت للعب ووقت لأكله
  5. المكافأة والكلام الحلو

ثالثاً: التوحد

  1. مبيعرفش يعبر عن نفسه بالكلام ومحصل اللغة عنده قليل جداً
  2. بيخاف من التجمعات الكبيرة في الأفراح والحفلات
  3. التكرار يعني لو بيلعب بلعبه معينه ومحطوطة بشكل معين لو أتغير شكلها أو مكانها يخليه يعيط
  4. لزمات الحركة، عنده حركة متعود يعملها سواء بالأيد أو حركة رأسه ، في ماشيته ، حركة بيعملها على طول
  5. شاطر جداً في مواد زي العلوم والرياضة، ممكن يحفظ كل اسامي الدول بكل المحافظات والشوارع، قدرة عقلية فائقة على الحفظ وحل المسائل الرياضية

الحل :

الأختبارات مع الاخصائي عشان يعرف هل فيه توحد فعلاً ولا دا مجرد خجل وأنطوائيه .. ممكن تشوف الملحوظات البسيطة دي

  1. لو طفلك كثير الحركة بس وقت المذاكرة والانتباه بيقدر يركز في واجبه ويعمله، تبقى دي شقاوة عادية
  2. معظم الولاد عندهم فرط حركة أكثر من البنات بسبب بنية جسمهم
  3. أسباب تشتت الانتباه وفرط الحركة ممكن تكون وراثية فلازم تعرفي لو جوزك كان كدا وهو صغير أو عمه، خاله
  4. لو تشتت الأنتباه مأثر على المذاكرة والحياة يبقى الأفضل تروحي لاخصائي
  5. ممنوع الضرب والعصبية والعند والمبالغة في العقاب مع فرط الحركة وتشتت الانتباه لأن نتيجته عكسية
  6. الصبر والتحمل منك لتصرفاته ومقابلتها بمرونه وتفهم هتخليه يعمل زيك
  7. لو طفلك مش أجتماعي أو مبيعرفش يعبر عن نفسه بالكلام مش شرط يكون توحد ممكن يكون خجل لأنه متعودتش على الأختلاط مع الناس فحاولي تكسري الحاجز دا الأول لو أتكسر يبقى اللي عنده خجل أجتماعي
اترك تعليق