العلاقات

أنا هتكلم هندي وأنت بتفهم فرنساوي، ممكن نتفاهم؟

الحب

لكل شخص منا لغة وطريقة بيعبر بيها عن حبه مش شرط أبداً عشان بعبر ليك عن حبي بطريقة غير طريقتك يبقى مبحبكش أو حبك أنت أكبر من حبي الموضوع أبسط من كدا بكتير، كل شخص فينا نشأ في مكان معين وسط عيلة معينه في مجتمع بكل حاجة حصلتله بتربيته بأفكاره بقى مجمع كل دا في مخه وهو دا اللي بيخليه يعبر عن حبه بشكل معين ممكن يختلف عنك لكن مش معناها ابداً أنه مش بيحبك وليكن مثلاً راجل بيتكلم فرنساوي ومراته بتتكلم هندي، تخيل حياتهم أكيد في الأول هيبقى فيه مشاكل لأنهم مش فاهمين لغة بعض لحد ما يبدأوا يفهمه بعض الكلمات وبعد كدا جمل لحد ما يجي التفاهم لما الراجل الفرنساوي يتعلم اللغة الهندية وهي تتعلم فرنساوي شوفتوا بسيطة أزاي كذلك لكل شخص مننا لغة وطريقة بيعبر بيها عن حبه بتكون هي دي اللغة اللي عاوز يستقبلها لكن الذكاء أنك تعبر عن حبك بالطريقة المناسبة للطرف الثاني عشان تستقبل طريقة الحب المناسبة ليك خلينا نشوف أزاي من خلال 5 لغات للحب

1-التشجيع ،التقدير،الكلام المعسول : فيه إنسان ربنا خلقه إنسان سمعي بيحب يسمع أكثر لكلامك عاوز يسمعك وأنت بتقوله شكراً، بحبك، برافو عليك، مقدر تعبك، تستحق كل التقدير، تسلم أيدك، شكلك حلو أنهاردا

مراتك عملت أي شغل ولو كان صغير قولها كلام حلو جداً حتى لو الحاجة نص نص، الكلام الحلو والتشجيع في الوقت دا هيخليها تحسن الأداء أكثر وأكثر والموضوع دا ينفع مع المدير لو بيتعامل مع موظفين بيشتغلوا بس مش أوي يشجعهم، لو جوزك بيشكيلك أنه تعب وفلوسه بتخلص على الأقساط ورجله بتوجعه هو مش بيحكيلك دا لمجرد الحكي لا دا طلب غير صريح أنه عاوز تقدير فأزاي تبخلي عليه بكلمه زي ربنا يخليك لينا أنت بتتعب عشان تسعدنا أنا مقدرة دا الكلمة دي كفيلة تخليه يقوم يهد جبل عشانك

2-الوقت: تخصيص وقت لشريك الحياة تقعد معاه هو بس من غير موبايل ولا نت ولا ماتش ولا مسلسل تركي ولا أي حاجة تقعد سوا تتكلموا تسمعوا بعض، تخرجوا سوا، تقروا كتاب حتى لو هتلعبوا شطرنج المهم أن الوقت يبقى ليه هو وبس

في الأجازات استغل لغة الوقت دي لأننا معظم الأسبوع مشغولين في مشاكلنا وشغلنا ومفيش وقت فراغ فمينفعش كمان الجمعة تقعد تشتغل فيه أو تقولها أحكي سامعك وأنت قاعد بتخلص شغل، أيوة شغلك هينجحك وهيزود دخلك بس لما تتضايق وتسيبلك البيت مش هتفرح بنجاحك دا وهي مش جمبك فحاول توزان وتديها من وقتك عشان تديك من وقتها لما تحتاج دا أنت كمان

3-الهدايا: وردة كل يوم ولا سيارة أخر السنة، استخدم المبدأ دا لو الشخص اللي معاك بيحب الهدايا أكتب ليه جواب وحطه في هدومة على مخدته، هاتله ورد، شكولاتة، القيمة مش في ثمن الهدية ولكن عشان أنت أفتكرته وعارف أنه بيحب الورد مثلاً فبتحب تجيب ليه يومياً

4-المساعدة: في شغل البيت في شغله، تصلح الكهربا، تنقل العفش، عربيتها العطلانه أنزل صلاحها حتى لو بوظتها هتفرح بشكلك اللي كله شحم عشان أنت اللي عاملها بأيدك

المناسبات زي أعياد الميلاد أعياد الجواز أعياد الحب أستغل أي مناسبة حتى لو عيد الأم ولا عيد العمال وهتلها هديه حتى لو خاتم فضة ومتنساش وردة كل يوم أو شكولاته حسب هي بتحب أي ولو موضوع الهدايا دا مش بيأثر فيها فهات بردو من وقت للتاني عشان متحسش من جواها أنك ناسيها

5-التقارب البدني: ممكن الشخص اللي قصادك  بيهدى لما تتطبطب عليه تمسك أيده، تحضنه، بيحس بقربك كل ما كانت أقرب منه

مراتك جاية تعبانة من الشغل ومع الولاد في البيت لا بأس في بعض المساعدة منك في تحضير العشاء مش هيقل منك والله ابداً دي هتحبك زيادة أنك ساعدتها، مفيش ست مبتحبش اللغة دي هي بتحب تشوف شريك حياتها البطل اللي بيساعدها في كل حاجة حتى لو كانت مساعدته أنه يفتح غطا السمنة دا بالنسبه ليها أنجاز وهتحب شكلك جداً وأنت متشعلق تعمل اللمبة في المطبخ عشان تنور لها وهي بتطبخ، هتشوفك رشدي أباظة في الوقت دا

التقارب البدني دا صحي في أي وقت لو جوزك جاي تعبان من الشغل وبيشكيلك من حاجة احضنيه وطبطبي عليه مع بعض كلمات التقدير، مراتك تعبانه وأنت بتساعدها وبتقولها كلمات تقدير أحضنها وبوس رأسها

لكل شخص مننا طبعاً لغة مفضله من دول بيتعامل بيها بس مش شرط تكون هي دي لغته طول الوقت لكن المهم تعرف أمتى تستخدم أيه في الوقت المناسب وكمان اللغات دي ممكن تستخدمها مع الأم والأب وأولادك خصوصاً التشجيع والوقت والأعمال الخدمية للأهل وابنك المراهق اللي مطلع عينك محتاج تشجيع وقرب بدني احضنه وطبطب عليه وقوله أنك بتحبه ولادك وأسرتك محتاجين وقتك فعشان يدولك اللي محتاج ليه عبر ليهم أنت الأول بلغتهم وأتعلموا بعض أسأل شريك حياتك أنت بتحب أيه في دول وبتحس بأيه لما أقولك كلام كويس ولا اجيب هدية ولا اطبطب عليك واعملهم كلهم شوف أكثر لغة بتفرحه وركز عليها لما تيجي تطلب منه حاجة أو تصالحه لو بيحب الهدايا يبقى لما تقنعه  هاتله ورده واعتذرله بورده، بيحب التقدير يبقى وضح ليه أد أيه أنت مقدره وأنك مش هتغلط في حقه تاني عشان هو يستاهل كل خير وانشر الحب عشان تستقبله

 

https://bazrameet.com/%d8%a3%d8%b2%d8%a7%d9%89-%d8%aa%d8%ae%d9%84%d9%89-%d8%a7%d9%84%d8%a8%d9%86%d8%a7%d8%aa-%d8%aa%d8%ad%d8%a8%d9%83-from-a-to-z/

عن الكاتب

سلمى شرف الدين

سلمى شرف الدين ، خريجة إعلام ، وبحب الدوبلاج والكتابة