ايه الفرق بين القلق ونوبات الهلع؟

49

معظم الناس بتتكلم عن القلق ونوبات الهلع كأنهم شيء واحد، بس في الحقيقة الحالتين مختلفين عن بعض.

ايه هي نوبة القلق؟

في دليل تشخيصي للاضطرابات النفسية اسمه (DSM-5)، الدليل دا مذكرش نوبات القلق كمرض بعينه لكنه قال عليه انه دليل على وجود كتير من الاضطرابات النفسية الشائعة، عادة ما بيرتبط القلق بالتوقع انك تكون مستني موقف أو تجربة أو حدث هيتعبك ويوترك زي امتحان خايف منه، أو مواجهة بتحاول تتجنبها، أو ممكن يجي بالتدريج لو اتحطيت في موقف غير متوقع زي انك ترد على سؤال مفاجئ في اجتماع شغل وانت مش محضر لإجابة! الحقيقة إن عدم وجود تشخيص محدد لنوبات القلق أو حتى مستواياتها المختلفة بتخلي تشخيص الأعراض اللي انت حاسس بيها مفتوح وممكن تترجم على انها اعراض لأمراض تانية مش على انها نوبة قلق.

أهم علامات نوبة القلق:

  • التوتر.
  • الضغط.
  • الخوف.

ايه هي نوبة الهلع؟

أما نوبات الهلع فهي حالة من الاضطراب بتهاجمك فجأة من اهم اعراضها الخوف الشديد اللي بيكون مدمر لنفسية الشخص، وبيجي معاها اعراض جسدية صعبة جدا زي تسارع نبضات القلب وضيق التنفس والدوخة.
واخر تشخيص من دليل الاضطرابات النفسية (DSM-5) بيعرف نوبات اهلع وبيصنفها على انها بتيجي يا اما متوقعة أو مفاجأة، وإن النوبات المفاجأة بتكون بسبب الضغوط الخارجية زي الفوبيا(الرهاب)، والنوبات ممكن تحصل ليا او ليك أو لأي حد لكن تكرارها بيكون مؤشر على اضطراب الهلع.

أعراض نوبات الهلع والقلق:

الحقيقة إن نوبات الهلع والقلق ممكن نعتبرهم وجهان لعملة واحدة لأن بينهم أعراض جسدية وحسية كتير، مش بعيد حتى تحس بالاتنين في نفس الوقت، مثلا: ممكن تكون قاعد قلقان بسبب نتيجة ماتش المنتخب وأول ما يتسجل فينا جول وقت ضربات الجزاء القلق دا يزيد والأعراض تبقى شديدة على جسمك لدرجة تصيبك بنوبة الهلع.

لو عايز تعرف اللي بيحصلك دا اعراض نوبة قلق ولا نوبة هلع حط في اعتبارك الكلام دا:

  •  القلق بيرتبط بالمواقف المتوقعة الموترة والمقلقة، اما النوبات فا مش شرط تحصل بسبب ضغوط،هي بتحصل فجأة.
  • القلق بيكون مستويات مختلفة خفيف أو متوسط أو شديد، مثلا ممكن تقلق قلق بسيط من الفشل ودا يخليك تحل الامتحان متسيبش فيه حاجة، وممكن تقلق لدرجة تتوتر وايدك تترعش وتعرق وتنسى كل حاجة ذاكرتها.
  • خلال نوبة الهلع، بتحصلك حالة “الكر والفر” يعني جسمك بيحس بإنه في خطر فا يحاول يهرب من المكان اللي هو فيه.
  • القلق بيجي تدريجي وممكن تحس بحاجات زي تشنج في المعدة أو ارق،أما نوبات الهلع عادة بتيجي فجأة تسارع نبضات قلب وضيق تنفس، وعرق، ودوخة، وضعف في النظر أو هلاوس.
  • اعرف ان نوبات الهلع هتخوفك منها شخصيا لدرجة إنك هتحاول تتجنب كل المواقف والأماكن اللي ممكن تعرضك لنوبة هلع.
  • نوبات الهلع وأعراضها الشديدة إذا تكررت يبقى دي علامة على الاضطراب.

سواء كانت نوبات قلق او هلع حاول تعرف ازاي تتخطاها وتسيطر على قلقك وخوفك، ولو الموضوع خرج من ايدك بننصحك تشوف دكتور.

اترك تعليق