العيال

5 طرق لمساعدة الطفل الانطوائى يقلب أجتماعى

فومو عالي

ليه أبنى مش بيلعب مع باقى الأطفال؟!

لعب والتفاعل مع الأطفال مهارات مش موجودة عند الطفل الانطوائى كمان هى ذى كتير غيرها من المهارات اللى ممكن يكتسبها الطفل بالتدريج.

مينفعش نجبره على التفاعل لأنه برغم سنه الصغير فهو بنى أدم ذينا وله شخصية مستقلة من أول ما بييتدى يتفاعل بتلاقى الزنان ، أبو دم خفيف ، الخواف، الحنين ، الأجتماعى أو المتباهى.

كل طفل مختلف عن التانى و مهما كان صعب و مغلبك إلا أنك هتلاقى فى شخصيته حاجات حلوة.

فمثلا الطفل الانطوائى

عيوبه :

  1. معندوش مهارات اجتماعية.
  2. مش بيحب يلعب مع الأطفال اللى فى سنه.
  3. بيفضل الفرجة عن المشاركة في اللعب
  4. بيقلق من المواقف الجديدة

بس أوعى تنسى الحاجات الحلوة فى شخصيته ذى: 

  1. معتمد على نفسه و بينمى المهارة دى دايما.
  2. مستقل و مش متسرع
  3. بياخد وقته و يفكر كويس قبل ما أى قرار بياخده.

و دى مميزات فى شخصيته مش موجودة عند أطفال كتير فى سنه.

بس كل أم بتحب تشوف أبنها مندمج مع الأطفال و فنفس الوقت معتمد على نفسه عشان كدا ممكن تجربى شوية طرق تساعده ينمى مهاراته الأجتماعية.

5 طرق لمساعدة الطفل الانطوائى

1- مهدي له الطريق : 

عرفى الطفل قبل المواقف الجديدة، أيه هيحصل ؟
يعنى لو فى حد جى يزوركم تكلميه قبلها عن الضيوف و عرفيه أنتى محتاجه منه يقابلهم أزاى.

2- أبدئى بالتجمعات الصغيرة

عشان يتعود بالتدريج أشركيه فى تجمعات صغيرة مع الأقارب ممكن من طفل أو أتنين و يكون عارف هما مين.
لأنه فى الغالب هيكون بتربكه التجمعات الكبيرة.

بالتريج له أتفاعل ممكن تبتدى تكبريها بالتدريج عشان ميتصدمش.

3- الحواديت

بتساعدنا فى حل كتير من المشاكل مع الأطفال أحكيه حواديت عن الأطفال و أزاى بيتعرفوا على بعض و يبدأوا اللعب.
لأنه ممكن يكون انطوائى عشان مش بيعرف يتعرف على الناس.

يعنى دورى على حواديت تناسب المواقف اللى محتاجة تعليمها لطفلك بشكل غير مباشر.

4- احترمي أهتمامات الطفل

الهدف انه يكتسب مهارات أجتماعية مش أننا نلغى شخصيته عشان كدا لازم نحترم أهتماماته و رغباته.
فلو بيحب القراءة شجعيه و أشتريله كتب بيحبها لو عايز يلعب لوحده و مش عاوز يخرج مفيش مشكلة.
بلاش القهر عشان ميكرهش التجمعات بزيادة كل حاجة بتتاخد خطوة خطوة.
أديله وقته الخاص و فى نفس الوقت مهدى الطريق للأختلاط عشان يتحسن

5- دورى على أطفال شبه

طبعا من حيث الأهتمامات لأن الطفل الانطوائى ذى كل الأطفال له حاجات بيحبها و ألعاب مش بيقدر يقومها.

فلو ساعدتيه يتعرف على أطفال بتحب نفس اللعب أو الأفلام مثلا هيكون التعارف أسهل كتير قوى.

طبعا فى أوقات الطفل بيكون محتاج مساعدة من المختصين  و مساعدتك ليه لوحدها مش كفاية لأن الانطوائية بتكون عرض لنوع من ألإضطرابات.

أمتى ندور على المساعدة النفسية؟

الخجل و صعوبة الأندماج طبيعى يكون من صفات الطفل الانطوائى بس فى مراحل بيظهر فيها أنه مخبى وراه مشكلة ذى:

  • لما يكون الطفل فى عمر 4 شهور و لو ضحكتي له مش بيرد البسمة.
  • و عند 9 شهور مش بيتفاعل معاكى و مش بيردد الأصوات وراكى كمان مش بيتفاعل مع تعابير وجهك وابتساماتك.
  • بيتأخر فى النطق عند عمر سنة و حصيلة كلماته بتكون قليلة على عمره.
  • عند سنة ونص بيخاف من الغرباء مش بيحب حد يشيله مان عنه مشكلة فى تميز الأشياء البسيطة أو الأشخاص العيشين معاه.
  • تواصل عينه ضعيف او منعدم بيخاف يبص فى عنين حد .
  • اما فى عمر سنتين تلاقيه بيفضل يلعب لوحده دايما و مش عاوز يختلط حتى بعيلته.
  • كل ما يكبر كل ما يزيد خوفه من الناس و لو حاولوا يقربوا منه أوى بتجيله نوبات هلع .
  • عند سن المدرسة بيحب طول الوقت يلعب لوحده بعيد عن باقى الأطفال هادى حتى مش بيحاول يتفاعل مع المدرسين.

أحنا مش شبه بعض و الطفل عمره ما هيكون كربونه من أمه و أبه عشان كدا مهم نفهم شخصية ولادنا و نتعامل معاهم على أساسها عشان نريحهم و نرتاح أحنا كمان.

يا ترى أيه شخصية طفلك ؟

عن الكاتب

نهلة شعلان