سايكويكي

مرض الديسلكسيا أو Dyslexia : من أسباب صعوبات التعلم عند الأطفال

التعلم

أغلب الأطفال بتتعلم مبادئ القراءة فى سن الروضة و لو الموضوع صعب شوية على الطفل بيطول معاه لحد أولى أبتدائى.

لكن الطفل اللى بيعانى من الديسلكسيا أو Dyslexia مش بيقدر يفهم أساسيات القراءة صح فى السن الصغير ده .

تعرف ايه عن مرض الديسلكسيا ؟

مرض الديسلكسيا نوع من أنواع صعوبات التعلم و يعنى أن الطفل يكون بيعانى من صعوبات القراءة.

من كتر ما هو مرض مرهق للأطفال فى ناس بتسميه إعاقة القراءة و ده ممكن يعانى منه للطفل العادى و اللى مستوى ذكاءه طبيعى.

فى ناس مش بتقدر تشخصه قبل سن البلوغ رغم أن الطفل بيكون واضح أنه ذكى بس مش قادر يجيب درجات كويسة فى المدرسة.
عشان الأب و الأم ساعات بيفسروا الموضوع ده على أن الطفل كسول أو ملوش فى التعليم ؟

كمان لأن الديسلكسيا فى الغالب بتكون نتيجة صفات وراثية بتأثر على طريقة تعامل عقل الطفل مع المعلومات.

لكن برده ممكن نغلبه و نساعد الطفل يتحسن فى المدرسة لو تابعنا شوية جلسات متخخصة تساعده يحسن أداءه فى القراءة.

نعرف منين أن الطفل بيعانى من الديسلكسيا؟

طبعا الحكاية هتختلف كتير من طفل للتانى و كمان حسب مرحلة الدراسية و عمر الطفل
غالباً بيكون المدرس أول واحد يلاحظ المشكلة مع بداية تعليم الطفل القراءة.

(ممكن نقرأ صعوبات التعلم : تبات تعلم فى المتبلم و يصبح ناسى)

فى دراسات بتقول أن 25 % من الأطفال اللى بيعانوا من الديسلكسيا بيكونوا أصلا عندهم فرط الحركة ونقص الانتباه.
و ساعات مش بنكتشف المرض غير فى سن المراهقة.

أعراض الديسلكسيا فى سن المراهقة؟

و هى مش بتختلف عن الأعراض فى سن الطفولة :

  • بتلاقى صعوبة فى القراءة والكتابة و غالبا مبيعرفش يتهجى.
  • مشاكل كتير أوى بتقابله لما بيتعلم لغة أجنبية جديدة و هو أصلا بيعانى مع العربى.
  • صعوبة الحفظ و التركيز .
  • ميعرفش يلخص قصة أو يكتب موضوع تعبير.

طب هو مرض الديسلكسيا ده له علاج ؟

ذى ما قلنا قبل كدا عن صعوبات التعلم أنها ملهاش علاج بس فى طرق تساعدنا عشان نحسن مستوى تعليم الطفل.

و ده بيكون بمساعدة من متخصصين فى معالجة الكلام و أساليب القراءة.

فى تقنيات ممكن نستخدم بيها حواسنا ذى السمع، الرؤية واللمس عشان نحسن مهارات القراءة عند الطفل.

الأب والأم دورهم مهم جداً فى العملية دى .

نصائح:  أزاى تساعدى طفلك ؟ 

  • مش أى مشكلة تقابل الطفل فى المدرسة نقول أصوله”  غبى أو كسول” مهم أننا نراقب تصرفات ولادنا فى سن رياض الأطفال عشان نكتشف أى مشكلة بدرى .

و ده ممكن يساعدنا نتحسن بسرعة و يسهل على ولادنا التعب طول سنين المدرسة الكتير .

  • لازم الأب و الأم يثقفوا نفسهم دايما و يتابعوا أيه المشاكل اللى ممكن تواجه الطفل فى كل مرحلة عمرية.
  • كمان لو بيعانى من مشكلة معينة لازم نكون متابعين دايما كل الطرق الجديدة اللى ممكن تساعدنا عشان نعالجه.
  • دعمى دايما ثقة طفلك بنفسه و مهما كانت قدراته علميه يتعامل معها ، يتقبلها و يشتغل عليها عشان يحسنها.
  • اقرائى دايما للطفل بصوت عالى و تبتدى من سن 6 شهور لحد ما يبتدى يقرأ معاكى.
  • ساعدى الطفل فى حل الواجبات المنزلية كمان ممكن توفري له مدرس لتعليم القراءة و يا ريت يكون متخصص فى حالات صعوبات التعلم.
  • شجعى الطفل على ممارسة أنشطة يحبها ذى الرسم أو الرياضة أو الموسيقى عشان يحس إنه مميز و متفوق.
  • الشعور ده هيساعده يتعب شوية عشان يحسن مستواه التعليمى كمان.
  • بروزيله نقاط القوة فى شخصيته عشان يبطل يحس أنه أقل من أصحابه دراسيا.
  • لازم نتأكد من أن الطفل بدأ طرق العلاج الصح و نتابع تقيم أداءه بأستمرار عشان لو مش بيتقدم ممكن نغير البرنامج العلاجى. 

و لاحظتى أن طفلك محبط أو مكتئب عشان مشاكله الدراسية فممكن نلجأ للعلاج النفسى عشان نحل المشكلة.

المهم أننا ندعم ولادنا دايما و نساعدهم يتغلبوا على أى مشاكل تقابلهم بلاش نحبط الطفل و نحسسه بالفشل.
الطفل لو عنده صعوبات التعلم ممكن يتفوق فى مجالات تانية كتير أوى.

تفتكروا ممكن نساعد ولادنا أزاى يتعلموا القراءة؟! 

عن الكاتب

نهلة شعلان