العيال

الدسكلكوليا: أزاى نساعد الطفل يتعلم الحساب ؟!

الدسكلكوليا

كتير من الأمهات بتشتكى من أن أبنها مش قادر يفهم الرياضيات و اى حاجة ليها علاقة بيها أو بيعانى من الدسكلكوليا .
يعنى يكون الطفل حلو كدا فى تالتة أو رابعة أبتدائى و لسه بيتلخبط فى الأرقام و مش بيعرف يقرأها.
و لو كتبها بيكتبها بالعكس ده غير بقى مشاكل العد و الجمع و الضرب و اللى بيكون صعب على عقله أنه يستوعبها.
و تبدأ الام تتعامل مع الطفل على أنه” غبي ” فرغم الدروس و كتر المذاكرة برده مش بيفهم.
الحكاية ملهاش علاقة بالذكاء و الغباء لكن ممكن تكون الدسكلكوليا السبب الأساسي فى مشكلته.

تعرف أيه عن الدسكلكوليا؟!

دى نوع من صعوبات التعلم بيكون صعب على الطفل تعلم مهارات الحساب عشان كدا بيسموها عسر الحساب.
و هو شبيه بعسر القراءة بس هنا بيكون الصعوبة فى قراءة الأرقام و تعلم العمليات الحسابية و النظريات.
و ملوش علاقة بمستوى ذكاء الطفل يعنى ليصيب الأطفال اى كان مستوى ذكائهم عالى ، متوسط أو حتى ضعيف.

أيه أسبابه ؟!

  • غالبا بيكون السبب هو مشكلة فى أشارات المخ بتخلى أدراك الأرقام و عمليتها مشكلة.
  • كمان ساعات بيكون ليه علاقة بالذاكرة القصيرة و ده بيخلى الطفل مش قادر حتى يحل العملتيات الحسابية البسيطة.
  • برده العوامل الوراثية و الاضطرابات الخلقية بتساعد ان الطفل يعانى من الدسكلكوليا.
  • ممكن يكون الدسكلكوليا عرض عند المصابين بمتلازمة غريستمان.

ما هي أعراض الدسكلكوليا ؟

  1. أغلب الأطفال لما بتتعلم الأرقام و العد بيكون سهل عليها عد تلت عناصر فى مجموعة بعد كدا العملية بتزيد اما طفل الدسكلكوليا بيكون صعب عليه جدا.
  2. صعوبة مع الحاجات اليومية البيسطة ذى أنه يقرأ الساعة.
  3. صعوبات متكررة في الرياضيات و بيرتبك من العلاماتذى + ، – ، × ، ÷ و غيرها.
  4. عكس الأرقام يعنى بيلخبط فى الكتابة فمثلا لما يشوف رقم 16 يكتبه فى كرسته 61 بيقلب الآحاد والعشرات.
  5. صعوبة عمل أكتر من عملية حسابية في المسألة الواحدة
  6. صعوبة تمييز الإقام اللى ممكن تتقلب ذى (9 – 6) مش بيعرف هى تسعة و لا ستة.
  7. صعوبة تقدير الأحجام أو المسافات يعنى مش بيعرف المسافة دى 10 و لا 20 سنتى.
  8. صعوبة في فهم مفهوم الوقت مش بيعرف مع مرور الوقت هو أتأخر و لا لسا بدرى.
  9. صعوبة التعامل مع الفلوس بات لو العملة كبيرة شوية أو أزاى يعد الباقى.
  10. مهما كبر بيفضل يعد على صوابعه عشان يحسب.

الدسكلكوليا بتعمل أيه فى نفسية طفلك؟

لو مهتمناش بعلاج الطفل و فضل الموضوع معاه مده طويلة هيأثر بشكل سلبي على حالته النفسية و العاطفية :

  • صعوبات التعلم بتخلى نتيجة الطفل فى المدرسة مش حلوة.
  • كمان سوء معاملة الأطفال و المدرسين نتيجة عدم فهم حالته بضعف نظرته لنفسه و قدراته.
  • تجنب الرياضيات بوجه عام و و ده طبعا هيخليه يبعد عن التعليم كله.
  • السلوك العنيف فى محاولة للدفاع عن نفسه و تعويض النقص.
  • الميل إلى الاكتئاب نتيجة عدم قدرته على حل مشكلته.

أزاى ممكن علاج الدسكلكوليا؟

عشان نتجنب المشاكل النفسية و العاطفية لعسر الحساب نحاول نكتشفها بدرى على قد ما نقدر عشان نعالجها بدرى. .

  • يعنى لو الطفل بيعانى من صعوبة فى فهم الرياضيات ممكن نعرضه على مختص
  • عشان نتأكد بدل ما نتكل على أنه غبى وخلاص.
  • مهم أننا نساعد الطفل يعرف هو متميز فى أيه ؟ عشان نزود ثقته فى نفسه.
  • تعليمه بطرق مبتكرة عشان يتعلم ينظم أفكاره صح .
  • نستخدم وسائل ملموسة عشان نشرح المسائل الرياضية و بالتدريج ننقل للأمثلة المجردة.
  • تشجيع الطفل على حب الرياضيات عن طريق التعليم باللعب بالأدوات و الألعاب اللى بتساعده فى التعليم .
  • بلاش تخوفيه و تزعقى فبعد كدا هيخاف يسأل.

كمان ممكن جلسات علاج عسر الحساب تتقسم لمجموعة أنشطة تتضمن التعليم باللعب مثل : 

1- أنشطة تدريس المفاهيم الرياضية ذى :

  • أنشطة تصنيف للأرقام والتجميع
  • مفهوم العد
  • أزاى نقرأ الأرقام بشكل صحيح؟

2- أنشطة تدريس مهارات الرياضيات ذى:

  • أنشطة الجمع
  • أنشطة الطرح
  • أنشطة الضرب والقسمة

3-أنشطة تدريس حل المشكلات ذى:

  • مشكلات مسأل القصة
  • تعليمه خطوات للنفكير
  • تحديد وقت للتفكير

فى النهاية بزرميط بتقولكوا دعموا الطفل فى كل خطوات حياته لو متفوق أو لا لان اأغلب مشاكل الطفل فى التعليم بتأثر على نفسيته.

عشان كدا مهم أننا نساعد الطفل يعدى المشكلة من غيرالمعانة النفسية لازم نقبل قدرات الطفل مهما كانت قليلة .

ابعتولنا مواقف  ولادكوا مع تعلم الحساب . 

 

عن الكاتب

نهلة شعلان