اضطراب نوبات الهلع ازاي تشرحه لعيلتك وصحابك عشان يساعدوك؟

380

حمل الليالي خفيف لما يشيلوه اتنين، أكيد الواحد مننا هيحب يشارك أهله وصحابه لو تم تشخيصه باضطراب نوبات الهلع لكن هل المرض ده هيأثر على علاقتك بيهم؟ اعرف إن محدش هيفهم تجربتك زيك، مثلا صحابك وعيلتك ممكن ميكونش عندهم الوعي الكافي بحالتك وميتفهموش قد ايه صعب إن الواحد يجيله نوبة هلع.

وعشان اللي ميعرفش بيقول عدس، منهم اللي هيبني افتراضات وهمية (هيفتوا) بخصوص اضطراب القلق، وهيكون عندهم أسئلة كتير بخصوص حالتك، متحسش إنك داخل تحدي وانت بتشرحلهم لأنهم في الاخر الناس اللي بتحبك.

دي خطوات ممكن تتبعها في كلامك معاهم عشان تفهمهم اضطراب نوبات الهلع:

1: ابدأ بشرح اضطراب نوبة الهلع:

ابدا بشرح كلمة (اضطراب نوبات الهلع) انه مرض يخص الصحة النفسية معروف باسم اضطراب القلق وأكبر عرض للاضطراب دا هو (نوبات الهلع).

مقال يهمك: نوبات الهلع أو البانيك أتاك: إيه هي وإزاي تتعامل معاها

2-كلمهم عن أعراض نوبات الهلع:

ولأن احسن حد يوصف الاضطراب هما الناس اللي بيحسوا بيها، سألنا كذا شخص بتصيبه نوبات هلع عن أعراضها.

ودي كانت ردودهم:

  • “لما بتجيلي نوبة الهلع ببدأ احس بألم في الصدر، ونبضات قلبي والعرق بيزيدوا وبحس إني خايف”.
  • “ساعات مبحسهاش نوبة هلع بحس كأن جايلي أزمة قلبية، لو جاتلك اعراض نوبة هلع شديدة لازم تطلب مساعدة طبية واوعى تتجاهل الاحتمالات دي”.
  • “بتجيلي نوبات هلع مفاجأة يعني ممكن تجيلي في أي وقت من غير ما أكون في موقف يستدعي القلق أو الخوف”
  • “بتجيلي نوبات الهلع في كل حتة وانا بسوق أو وانا خارج من البيت، وفي أي موقف تاني بيوتر أو يقلق”.
  • “لما تجيلي نوبات هلع ببان كأني اتنشن واوفر بس مبكونش كده محدش بيختار انه يحس باضطراب الهلع”.

ودي مقالة عن الأعراض: 14 من أهم أعراض نوبات الهلع

3- شارك مخاوفك

وانت بتشرح تشخيصك باضطراب نوبات الهلع قولهم لو عندك فوبيا بتسبب الاضطراب زي (رهاب الخلاء) ودا بيكون خوف من الأماكن العامة أو انضمام لأنشطة اجتماعية فيها ناس كتير، لو عندك الفوبيا دي اشرحلهم ايه بالظبط اللي بيعرضك ليها. شخص بيحكي تجربته من نوبات الهلع اللي بيجي معاها (رهاب الخلاء):” الحقيقة إن مواقف معينة بس هي اللي بتسببلي نوبات الهلع زي اني اكون وسط ناس كتير أو اسوق في زحمة أو اضطر اتكلم قدام جمهور”.

مقال يهمك: رهاب الخلاء أو أجورافوبيا: أعراضه؟ وبيتعـالج إزاي؟

 4- اتكلم عن العلاج

بعد ما تشرحلهم حالتك واعراضها، لازم تطمنهم إن في علاج، لو دكتورك قالك خطة علاج شاركهم الخطة دي، ولو انت اللي بحثت وحطيت خطة علاج لنفسك خليهم يساعدوك تنفذها، ممكن تقولهم الاقتراحات دي:

  • ” في كذا خطة علاج وانا قررت اروح اتعالج/ اخد علاج أو الاتنين”.
  • “انا بروح جلسات علاج ومع مرور الوقت اكيد هحس براحة اكتر في المواقف اللي بتخوفني”.
  • “هستخدم مضادات اكتئاب/ الدكتور كتبلي الدوا (الفلاني)، هيخليني اتحكم في نوبات القلق عندي”.
  • “الدكتور كتبلي مهدئات هتقلل حدة نوبات القلق وهتساعدني اتخطى النوبات”.

حاجات لازم تاخد بالك منها وانت بتتكلم عن نوبات الهلع:

  • مش لازم كل حاجة تحكيها، لو في حاجات مش مريحاك أو بتفضل إنك متتكلمش فيها يبقى مش لازم تضغط نفسك.
  • هتشارك مين بحالتك وظروفها ومين لا، لان اكيد في ناس مش محل ثقة أو مش هيكونوا متفهمين.
  • شارك كل المصادر اللي تعرفها مع صحابك القريبين وأهلك سواء مقالات زي دي أو فيديوهات بتزود الوعي بخصوص نوبات الهلع.
  • جهز اجابات للأسئلة اللي ممكن يسألوها زي هي النوبات دي خطيرة؟ مدتها قد ايه؟ واشرحلهم ازاي ممكن يساعدوك.
  • لازم تدرس وتتابع كويس ايه هي الاعراض والتشخيصات وأفضل طرق العلاج.

مقال يهمك: هي نوبة هلع ولا أعراض كورونا (Covid-19)؟

تعليق 1
  1. generaleg يقول

    مقال مفيد جدا شكرا ليكي

اترك تعليق