الانطوائي : ازاي أتعامل معاه وأخليه يتفاعل معايا

من أكثر المشكلات إلي بتعاني منها مع شريك حياتك، أنه يكون شخص انطوائي، الشخص الانطوائي لا هتعرفي تفتحي كلام معاه ولا تخليه يعبر عن رأيه ولا أعتراضه، ولا يعبر في المطلق، في الأول هتحسي أنك مش قادرة تتأقلمي مع الوضع، وأن دي مشكلة لا تحتمل، هتفضلي تتحملي صمته لحد أمتى!، طيب ليه تنهي علاقتك بيه!، لما تقدري تعرفي مميزاته وتتقبلي انطوائيته وتقللي منها كمان..

مميزات الشخص الانطوائي

1- بيعتمد على الأفعال ومش الكلام :

  • مش هيعرف يعبر عن حبه ليكي بالكلام صحيح، لكنه هيترجمه في شكل أفعال، لو مرتبط هيحاول يخطبك وخطبك هيتجوز وفي الجواز هيكون مسؤول عنك وعن كل حاجة محتجاها، كل وعد وعدك بيه هينفذه ولو آخر يوم في حياته
  • ولأنه بيعتمد على الأفعال وكلامه قليل، فقدري أنه صادق معاكي جداً

2- قادر على تكوين بيت وأسرة :

  • لأنه مش بيحب الاجتماعات وبيفضل البيت، فهو أكثر شخص هيحب أنه يعمل أسرة صغيرة وهادية وهتكون هي مركز أهتمامه وعطاءه وحياته

3- بيحل المشاكل :

  • أكثر حد بيقدر يسمع، ويتحكم في أنفعالاته وعصبيته، ويقدر يأخد القرار المناسب ويحل أي مشكلة بالهدوء ومن غير ما يزود المشكلة

ازاي تتعاملي مع  شريك حياتك الانطوائي :

1- بيحب الوحدة :

  • بيحب يقعد لوحده فترات طويلة، بيحب قعدة البيت والهدوء والسكون

الحل : لو أنتي بتحبي قعدة البيت أقعدي معاه، شغلوا فيلم، أو موسيقى هاديه وشاركيه الهدوء بدل ما يشارك نفسه لحد ما يتعود على وجودك

2- كلامه قليل :

  • دا راجع لأنه مش بيحب يتكلم عن نفسه كتير، عنده حكمة أن الصمت من شيم الرجال، وأن الكلام لازم يكون في وقت معين وليه لزوم مش في كل وقت، وكثر الكلام بيوقعه في الغلط

الحل : أفتحي معاه مواضيع عامة، أحكي عن يومك، وقوليله ويومك، ولما يتكلم اسألي عن تفاصيل كلامه، ولو لقتيه بيتجاوب كملي لو بدأ يقلل كلامه أفتحي موضوع تاني

3- مبيحبش التجمعات :

  • بيفضل التجمع الصغير عن العزومات الكبيرة إلي فيها ناس ميعرفهمش ولازم يتعامل معاهم ويضحك ويكلمهم في حوارات كتير وهو أصلاً مبيعرفش يفتح مجال للكلام فهيفضل ساكت وعارف أنك هتتضايقي من سكوته

الحل : براحه مش مرة واحدة تعزمية على فرح كله ناس ميعرفهمش، خديه العزومات البسيطة وأبدأي عرفيه بالناس وقوليله دي كذا وبتعمل كذا، سلم على كذا يقربلنا كذا، وأفتحي معاهم حوار عنه، سواء شغله أو يومه حاجة أنتي عارفه أنه هيقدر يتكلم فيها، أول ما هيلاقي نفسه في بؤرة التركيز هيبدأ يتكلم ويعبر وهتنبهري، أقري دا كمان هيفيدك  وهيفيده7 حاجات سريعة جداً تظهرك واثق من نفسك

4- مبيعرفش يعبر عن مشاعره :

  • مش بيعرف يقولك مشاعره ناحيتك، حاسس بأيه، زعلان من أيه، بيحبك ازاي، دا لأنه متعودتش من صغره على التعبير عن ذاته وملقاش حد في أسرته يشجعه على التعبير عن مشاعره

الحل : عبري أنتي، قوليله بتحبيه ليه، مميزات فيه، زي أنه مخلص، وبيحب بيته وأهله وأنك بتقدري تثقي فيه، قوليله أيه بيعجبك في شكله في لبسه، لو صحي الصبح ومتشيك للشغل قوليله حلو اللبس دا عليك، هتلاقيه بيقولك أنتي كمان لبسك حلو ومع الوقت هيبدأ يعبر عن نفسه زيك، لأنه أتعود أنك بتعبري ومفيش أحراج، فهيبطل يتحرج عن التعبير وهيعبر بس الصبر وعلميه وعوديه

5- سلطي الضوء على مميزاته :

  • الشخصية الانطوائية مستمعة جيدة جداً، هيقدر يسمعك للصبح ومش هيقاطعك أبداً ودي حاجة الستات بتحبها، ليه متستغليش دا وتطلبي منه أنك تحكيله عن يومك وهو هيسمعك
  • بيعرف يهزر على فكرة، الشخص الانطوائي عادي بيعرف يهزر، أه هزار خفيف ومش مفهوم بس أضحكي، هيفرح بنفسه ويهزر تاني وثالث وهتلاقيه بقى شخصيه مرحه جداً
  • أنتي متخيلة يعني أيه جوزك ملوش غير البيت والشغل وبس، يعني أنتي ضامنه أنه مش هيبص لبرا، ولا عنده أصحاب سوء، يعني أنتي شريكة كل لحظاته، أستغلي كل دا وحوليه لصديق ومشارك في كل حاجة مش هيمانع حتى لو طلبتي مساعدته في المطبخ

شاركينا بتجربتك مع الشخص الانطوائي؟

اترك تعليق