ازاى تتعامل مع انسان طبعه صعب ؟
كلنا عارفين النوع ده من الناس الى موجود في حياتنا كلنا وبنضطر كتير أننا نتعامل معاه سواء كانوا من قرايبنا أو أصحابنا أو زمايلنا في الشغل ، علشان تعرف تتعامل معاهم أنت محتاج أنك تغير طريقة تفكيرك شويه . من خلال النصايح دى ، هتقدر تقلل من تأثيرهم عليك لو موجودين فى حياتك :
- متاخدش أي حاجة منهم بشكل شخصى :
أول حاجة تعملها هي أنك تغير طريقة تفكيرك ، وده ممكن يكون صعب بالنسبة لناس كتير لأن كلنا بنحس بالغضب لما بنسمع كلام يضايقنا منهم ، ولأنك مش هتقدر غالبا تغير طريقة تفكيرهم فحاول تغير طريقة تفكيرك أنت بمعنى أنك متخدش كلامهم وتصرفاتهم بشكل شخصى وحاول أنك تتجاهل كلامهم على قد ما تقدر .
- ظبط نفسك وخليك هادى :
من أفضل الحاجات الى ممكن تعلمها لما تقابل شخص حقود هو أنك تعد لعشرة وتاخد نفس عميق ، وتخليك هادى علشان متديلوش الفرصة أنه يستفزك ولما تكون هادى هيكون موقفك أكيد صح .
- افهم الأول وبعدين أتكلم :
النوع ده من الناس بيكون عايز بس أنه يتكلم و الناس تسمعه وغالبا كمان تتعاطف معاه ، علشان كده لو أنت عايز تكسبه خليه يتكلم واسمعه وبين تعاطفك معاه بأنك تستخدم كلام زى ” أنا فاهم قصدك ” ” أنا حاسس بيك ” ، بالطريقة دى هتخلى عنده ثقة فيك .
- افصل بين الشخص والقضية :
لأن أوقات كتير بنكون مضطرين أننا نتعامل معاهم ومش باختيارنا ، لازم نفصل بين القضية أو الموضوع الى بنناقشه وبين الشخص نفسه ، لأن ممكن لو فكرنا كتير في الشخصية ده يخلينا مش محايدين أبدا .
- خليك واثق من نفسك :
لو موجودين معاك الشغل وبيحاولوا يغلطوك ، قدم دايما الأسباب الى عندك واعرض وجهة نظرك بس أهم حاجة تكون واثق من نفسك وأنت بتتكلم علشان تقوى موقفك.
- استعين بطرف محايد :
مش عيب .. أحيانا بيكون في مواقف خارج سيطرتنا حتى لو جربنا كل الخطوات الى فاتت ، الحل الوحيد بيكون الاستعانة بطرف محايد يقدر يسمع للطرفين في حالة وجود مشكلة بينهم ويحاول يساعدهم يفكروا بمنطق مختلف ويوصلوا لحل وسط .
وأخيرا ، الخطوات الى فاتت كلها ممكن تأخد منك وقت وصبر علشان تقدر تحققها ، بس خليك متأكد أنها هتوفر عليك كتير في تعاملك مع النوع ده من الناس ، كمان لازم تفكر نفسك أنهم بيكون عندهم أفكارهم ومشاكلهم الخاصة ومش بتكون أنت بالذات المقصود لو وقعت ضحية .
