البزرميط

أكتر 7 شغلانات تناسب الشخصية الانطوائية

شغل مناسب الشخصية الانطوائية

أول حاجة لازم تعرفها إن الانطوائية مش مرض محتاج تتخلص منه ولا زي ما كتير من الناس بتقولك “إنت محتاج تبقى اجتماعي يابني والكلام ده”.. الشخصية الانطوائية ده طبع وشخصية. وانت كبني آدم مش محتاج تغير شخصيتك أبداً سواء كنت اجتماعي أو انطوائي، انت بس محتاج تفهمها عشان تبقى ناجح..

7 شغلانات تناسب الشخصية الانطوائية ومش مناسبة للشخص الاجتماعي:

التسويق على قنوات التواصل الاجتماعي

مش متضطر تتعامل مع ناس كتير، وفي نفس الوقت بتتعامل مع الناس كلها على الإنترنت.. الشخصية الاجتماعية أو عالأقل اللي رافضة تبقى انطوائية، هتلاقي صعوبة كبيرة إنها تقعد تكلم الناس من ورا الشاشة طول الوقت.

ماتخليش كلمة “تواصل اجتماعي” تخدعك.. الشغلانة دي مُناسبة جداً ليك لو ماكنتش اجتماعي .. إنت بس محتاج تدرس تسويق كويس لأن السوشيال ميديا ما هي إلا آداه للتسويق مش علم منفرد بذاته.

الشغل مع الحيوانات (بيطري مثلاً)

إيه ممكن يبقى ألطف من إن شغلك يبقى مع الحيوانات؟ (لو بتحبهم)..

كونك تبقى دكتور بيطري ده بيتيحلك إن شغلك كله يبقى مع الحيوانات وساعتها هاتبقى شغلانتك وفي نفس الوقت هوياتك ودي حاجة أكيد جميلة. لو بتفكر تفتح مشروع فدي سكة حلو برضه.. سواء كنت بتفكر تفتح محل، عيادة بالاشتراك مع دكتور أو حتى موقع إلكتروني للحيوانات الأليفة.

المحاسبة والمراجعة والحرف اليدوية

الشغل مع الأرقام أحياناً بيبقى أريح من الشغل مع بني آدمين بالنسبة لنـاس كتير. أينعم إنت هاتتعامل مع مديرك ومع فريقك ومع كذا شخص تاني إنمـا معظم وقتك إنت مقضيه مع نفسك وألتك الحاسبة وأوراقك ويمكن الـ Excel .

لو مابتكرهش الشغل مع الأرقام زيي فالمحاسبة والمراجعة ممكن تبقى اختيار هايل ليك. وممكن تقيس على كدة معظم الشغل اللي بيتيحلك إنك ما تتعاملش مع ناس كتير بشكل مباشر زي الحرف اليدوية مثلاً لو شاطر فـ حاجة معينة.

التصميم والبرمجة

تصميم برنامج أو موقع أو حتى تصميم فني بيحتاج وقت وتركيز وابداع. المجال ده كمـان لو أتقنته فهو من المجالات اللي ممكن تدخلّـك دخل محترم.

ميزو مهمة كمان في المجال بتوع التصميم والبرمجة إن لغتهم عالمية. يعني لو قدرت تعملهم في مصر يبقى تقدر تعملهم في أي حتة تانية.  وكمان تقدر تشتغلهم بشكل حر على الإنترنت بشكل كبير.

خدمات دعم المبيعات

دعم المبيعات هو جزء مُهم من إدارة التسويق اللي بيقوم بدعم إدارة المبيعات سواء كانت إدارة المبيعات جوا إدارة التسويق أو تحتها. ومش معنى إن إسم العنوان دعم المبيعات إنك هاتنزل تبيع وتتعامل مع ناس كتير ما تعرفهاش.

إنما دورك الأساسي هو إنك تسهل الشغل على فريق المبيعات وتساعده إنه يحقق هدفه من أي حاجة بيعملها ساء كانت زيارة عميل، مؤتمر، الخ.. وده من خلال التصميم والتخطيط والتجهيز للعملية البيعية اللي بتقوم بيها الشركة على مستوى الأدوات المختلفة اللي بتستخدمها.

الهندسة والكهربا

لما الإبداع يتداخل مع الحرفة والمهارة. معظم شغل الكهربا والهندسة إنت بتعمله لوحدك .. آه في فريق لما يبقى مشروع كبير بس برضه بيبقى كل حد مختص بحتة معينة في المشروع. ولما بيبقى فيه تواصل بين الفريق بيبقى تواصل تقني سهل جداً على أي شخصية إنطوائية إنها تقوم بيه لأنه نقاش معروف أبعاده فبيعتبر مُريح.

الكتابة طبعاً

الكتابة يمكن مش من المهن المطلوبة في مصر قوي. أو من أكتر المهن اللي ما بتأكلش عيش 😀 .. بس لو بتحبها هاتضحي عشانها وتاخدها كارير وأمرك لله.. عالأقل تعمل الحاجة اللي تبقى مبسوط وإنت بتعملها.. وضامن 100% إنك هاتشتغل لوحدك.

إيه الشغلانات التانية اللي شايفها مُناسبة للشخصية الانطوائية؟

عن الكاتب

أحمد الفرماوي