الصحة النفسية

إيه الفرق بين الدكتور النفسي والأخصائي النفسي وياترى تروح لمين فيهم؟

الفرق بين الدكتور و الأخصائي النفسي

كتير مننا عارف إن الفرق بين الدكتور النفسي والأخصائي النفسي هو ببساطة إن الأخصائي النفسي ماينفعش يوصفلك علاج طبي أو أدوية على عكس الطبيب. بس بما إننا كمصريين بنشخص نفسنا وبنكتب الدوا لنفسنا ونشتريه أساسًـا بدون الرجوع لأي حد متخصص فـ تعالى نتكلم عن الفرق الحقيقي بين الطبيب والأخصائي:

الدراسة عند الدكتور النفسي

الدكتور النفسي psychiatrist هو طبيب متخرج من كلية الطب ومتخصص في الطب النفسي يعني بعد حصوله علي بكالوريوس الطب بيحصل علي دبلومة في الطب النفسي ثم  تدريب على تدريب في الطب النفسي. والتدريب ده بيركز على تنمية مهاراته في عملية التشخيص الدقيق وعلاج الاضطرابات النفسية وتحديد الأدوية المناسبة لكل اضطراب

طريقة العلاج الدكتور النفسي

الدكتور النفسي بيركز في علاجه أكتر على استخدام الأدوية. هو آه بيدرس معلومات كتير عن العلاج النفسي باختلاف المدارس بتاعته، إلا ان العلاج بتاعه غالباً بيصب في العلاجات الطبية زي الأدوية والمهدئات والصدمات الكهربائية وهكذا.

هم مدرستين الحقيقة: منهم اللي بيعتمد في علاجه على الأدوية فقط، ومنهم من اللي بيجمع بين الأدوية والعلاجات النفسية زي العلاج المعرفي السلوكي .. وخلينــا مانخلطش بين الدكتور النفسي ودكتور المخ والأعصاب.

الدراسة عند الأخصائي النفسي

الأخصائي النفسي أو المعالج النفسي psychological therapist هو خريج كلية الاداب وبيتخصص في علم النفسي وحصل بعد كدة علي الماجستير والدكتوراة في علم النفس ومؤهل بحكم تخصصه إنه يفهم الطبيعة الانسانية والعمليات النفسية من خلال دراسته اساسيات علم النفس ونظريات الشخصية ومدارس علم النفس المختلفة.

كل الحاجات اللي درسها بييجي بعدها تدريب ميداني ومابيقدرش يزاول المهنة إلا بعد حصوله على ترخيص طبي بمزاولة المهنة من وزارة الصحة

ممكن الأخصائي النفسي يبتدي يشتغل بالليسانس (من غير دكتوراه) ويبقى واحد من ضمن اعضاء الفريق العلاجي وبيبقى مؤهل بحكم دراسته وتدريبهإنه يدرس حالة المريض وكتابة تقرير عنه ووضع تشخيص مبدئي .. لكن لايسمح للاخصائي النفسي بتولي مهمة العلاج الا بعد ما يحصل على ترخيص من وزارة الصحة

طريقة العلاج عند الأخصائي النفسي

أولأً هو بيعتمد في تشخيصه على الأعراض اللي قدامه أكتر من الأسباب العضوية أو الوراثية و بيعمل ده بناءاً على المقاييس النفسية والاختبارات، و بيقوم بتتبع مراحل العمر المختلفة للمريض عشان يعرف الأسباب الأساسية للمرض. وبناءاً على ده بيقدر يحدد خطة علاجية مناسبة بدون تدخل للأدوية الكيمائية أو عن طريق الاعتماد الطفيف عليها حسب الحالة طبعًا.

في أكتر من ألف نوع مختلف من العلاجات النفسية وطريقه شغلها إنها تخلق تفاعل شخصي منتظم بين الأخصائي والمريض، عشان تساعده يغير أو يتغلب على المشكلات بطريقة عملية. العلاج النفسي هدفه إنه يحل أو يخفف السلوكيات والمعتقدات والدوافع والأفكار والعواطف المزعجة، وتحسين العلاقات والمهارات الاجتماعية.

هل الدكتور ما بيستخدمش العلاج النفسي وبيركز عالأدوية بس؟

للأسف الإجابة صحيحة في بعض الأحيان.. في كتير من الدكاترة بيعتمدوا على الأدوية فقط. وكتير منهم بيستخدموا العلاج النفسي جنب الأدوية بس عشان يضمنوا إن زيارة المريض ليهم تتكرر.. وبالتالي يكسبوا أكتر.. بغض النظر هل هو مقتنع بأهمية العلاج النفسي ولا لأ.

كمان ميل الإنسان إلى الحل السهل المتثمل في حباية الدوا بيخليه يشجـع الدكاترة دول على كدة.. هو أنا لسة هالبس وأروح واستنى وأدفع وهكذ..؟! لا يا عم أنا أضرب الحباية وهابقى كويس.

إنمـا طبعاً ده ما ينفيش إن كتير من الدكـاترة بيجمعـوا بين العلاجين النفسي والدوائي عشان يقدروا يوصلوا لنتيجة كويسة مع المريض.. بل إن في منهم بيقرروا إنهم مش هايكتبوا أدوية أصلاً لو الحالة ما تستدعيش.

هل الأخصائي النفسي مش مقتنـع بالأدوية؟

برضه الإجابة هنا ليها جزئيين.. في أخصائي عارف إنه مايقدرش يكتب دوا فبيحقر من دور الأدوية وبيتهم اللي بيكتبهـا بالكسل والتربـح.

وفي أخصائي عارف قيمة الدوا وبيوصي بالمريض إنه يروح لدكتور نفسي عشان يحدد الدوا بتاعه عشان يقدر يساعده في العلاج النفسي.

تروح لمين فيهم؟ دكتور نفسي ولا أخصائي نفسي

بص هتلاقي إجابات كتير من عينه.. لو اللي عندك خفيف روح لأخصائي.. ولو عندك قصة كبيرة روح لدكتور.. وبصراحة الإجابة دي غلط. لأن اختيارك بين الدكتور والأخصائي النفسي مالوش علاقة بقوة المرض النفسي عندك ولا بنوعه وإنمـا بأنواع الأعراض والتشخيص وكيفية التعامل مع المشاكل اليومية دي.. ودي حاجات ما تقدرش تحددها بنفسك.

هو الصح أصلاً إنك تروح للاتنين.. بس نظراً لأن الحل ده مش عملي عشان الوقت والفلوس وهكذا .. فروح للإتنين وقرر بنفسك بعدهـا هاتكمل مع مين لو مش هاتقدر تروح للإتنين في نفس الوقت.

بقولك إيه ..

إنت مش لوحدك.. الناس اللي عندها أمراض نفسية كتير جدًا .. إنت بس واحد من القليلين اللي عندهم الشجاعة إنـهم يساعدوا نفسهم عشـان يبقوا أنجح وأسعد في حياتهم.

وإحنـا دورنا الوحيد في الدنيا إننا نساعدك.

سلامًا عليك أيهـا المناضل 🙂

عن الكاتب

أحمد الفرماوي