ساعد نفسك

لو عندك اضطراب القلق العام : إيه اللي لازم تعمله؟

اضطراب القلق العام

اضطراب القلق العام من أكتر الأمراض اللي منتشرة في العالم وفي مصر. وللأسف إحنا برضه بنتعامل معاه بسطحية وسذاجة كبيرة جداً.. فماشيين نوصف نفسنـا ونوصف اللي حوالينـا بصفات مش صح ومش منطقية لمجرد إننا معندنـاش فكرة أو بنتكسف أو مش راضيين نعترف بأهمية الصحة النفسية والعلاج النفسي.. وفي الآخـر محدش بيتضر غيرنـا.

اضطراب القلق العام أعراضه كتير ممكن تشوفهـا من هنـا.

المصيبة إننـا لما بنحس بالأعراض دي بنتهـم نفسنـا بحاجات سلبية كتير وده بيزود المشكلة.. بنتهم نفسنا إننا خوافين وجبناء وبنتهم نفسنا إننا مش اجتماعيين وإننا فاشلين وفي بعض الأحيان أنانيين .. ونفضل حاسين بالذنب لأننا مقصرين فـ حق نفسنا وفـ حق اللي حوالينـا  من غير مبرر.

لو عندك اضطراب القلق العام لازم:

  • تكتر من تواصلك مع الناس الي بتحبهم وجهاً لوجه، وتقلل من التليفون والشات والخ..)
  • تتعلم إزاي تقدر تستخدم حواسك عشان تهدي نفسك بسرعة خـاصة لو جالك أتاك لا قدر الله
  • تحاول تتحرك بشكل مستمر وماتقعدش في مكان واحد فترات طويلة
  • تعرف إن القلق مش حبيبك ومش صاحبك .. عارف بقولك كدة ليه؟ لأن عقلك الباطن بيصورلك إن القلق بيحميك من ارتكاب الأخطاء.. وده مش صـح. عقلك الباطن ده هو نفسه اللي بيخليك تعيط من مشهد دراما في التليفزيون مع إنك عارف إنه تمثيل (فهمت ليه لازم تبذل مجهود إنك ماتصدقوش؟ لأنه مش منطقي).
  • لازم تتعلم مجموعة متنوعة من تقنيات الاسترخاء والتأمل. ماتقولش عليهـا أي كلام ولا هجص ولا الكلام ده.. التمرينات دي يمكن تكون في نظر ناس تانية هجص وأي كلام .. إنمـا صدقني هي مُهمة جداً ليك.. بل ممكن تمرين تنفس في وجهة نظرك حاجة بسيطة وتافهة يسـاعدك فعلاً في حالة حدوث هجمـة لا قدر الله.
  • نام كويس من سبع لـ تسع ساعات في اليوم .. وحاول تقلل من من الكافيين والكحول والنيكوتين وخد بالك دول عدوك الأول.. أنا ماقدرش أقولك بطلهم من غير مأقولك تبطلهـم إزاي .. لأن الحاجات دي زي ما بتأثر عليك بالسلب.. تبطيلها بطريقة غلط هايبوظ الدنيا أكتر لأن ليهـا آثار مهدئة على اضطراب القلق.
  • خلي المهدئ اللي الدكتور كاتبهولك معاك دايماً عشان لو لاقدر الله احتاجته. وخلي دايماً معاك الروشتة في المحفظة عشان أي مسائلة قانونية ممكن تتعرضلهـا في أي وقت.

طبعاً المقال ده موجه للنـاس اللي تم تشخيصهـم باضطراب القلق العام فعلاً،، وعشان كدة هانقول هنا:

إيه الفرق بين التوتر والقلق الطبيعي واضطراب القلق ببساطة؟

  • القلق الطبيعي: بتقلق آه، لكن قلقك ده مابيوقفش حياتك ولا مسار يومك الطبيعي.
  • اضطراب القلق: بيأثر على يومك بشكل سلبي وملحوظ لدرجة إنك ممكن تضيع فرصة مقابلة شغل (إنترفيو) مهم، ممكن تخترع حجة عشان ماتقابلش حد جديد جاي مع صاحبك، وممكن ترفض تروح مناسبة عامة المفروض إنك تحضرها وهكذا.
  • القلق الطبيعي: بتقدر تتحكم فيه وتمنطقه (تحطله أول من آخر)
  • اضطراب القلق: مابتقدرش تتحكم فيه ولا تهديه وبيفضل موجود.
  • القلق الطبيعي: منطقي وليه أسبابه.. زي إنك تبقى مسافر فـ قلقان عشان كاوتش العربية مش كويس.
  • اضطراب القلق: أسبابه مش منطقية.. زي إنـك تحس إنك هاتعمل حادثة في أي لحظة مع إنك ماشي في شارع مش سريع وعربيتك مافهـاش مشاكل مثلاً.

طبعاً المقال ده مش لعلاج ولا تشخيص اضطراب القلق العام، إنمـا هو مساعدة بس إنك تعرف تتعامل معاه مش أكتر.

عن الكاتب

أحمد الفرماوي